Media icmal- 08.08.2023

Ölkədə yanğın riskləri, Bakıda kənd təsərrüfatı məhsullarının istehsalı, havaların isti keçməsi, iyulda gün vurmaların sayı bu gün(08.08.2023) üçün əsas müzakirə olunan mövzulardır.

“525-ci qəzet “saytında yayımlanan “Meşələrin İnkişafı Xidməti yanğın riski ilə bağlı əhaliyə xəbərdarlıq edib” sərlövhəli yazıda gələcək meşə yanğınlarının baş vermə ehtimalları haqqında danışılıb. Müəllif qeyd edir ki, aparılan araşdırma və təhlillər meşə yanğınlarının əsas səbəbinin insan faktoru olduğunu göstərir.  Bu haqda Meşələrin İnkişafı Xidmət rəisi Cabbar Qəribovdan müsahibə alınıb. Onun sözlərinə görə hazırda ölkə ərazisində müşahidə olunan isti və quraq hava şəraiti səbəbindən təbiət əraziləri, yaşıllıqlar, o cümlədən otlaq sahələri, meşə massivləri yanğına daha həssasdır: “Bütün bunları nəzərə alaraq, hamımız təbiət qoynunda olarkən hədsiz diqqətli olmalı, yanğın təhlükəsizliyi qaydalarına ciddi əməl etməli, üzərimizə düşən məsuliyyəti hiss etməli, odla ehtiyatlı davranmalı, söndürülməmiş siqaret kötüklərini ətrafa atmamalı, davranışlarımızda maksimum dərəcədə ehtiyatlı olmalıyıq. Çünki hər birimizin ani ehtiyatsızlığı və etinasızlığı qarşısıalınmaz yanğınlara səbəb ola bilər”.

“Dövlət Xidməti havaların isti keçməsi ilə bağlı işəgötürənlərə xəbərdarlıq edib” sərlövhəli yazıda isti keçən hava şəraitinə görə işəgötürənlərin yaratmalı olduğu şərait haqqında məlumat verilib.  Müəllif qeyd edir ki, İşçilərə sərinləmək üçün imkan yaradılmalı, onlara fasilələr verilməli, fasilənin sayı və müddəti işəgötürənlə həmkarlar təşkilatının birgə qərarı əsasında müəyyən olunmalıdır.

Anews.az saytında yayımlanan “Bakıda kənd təsərrüfatı məhsullarının istehsalında azalma var” sərlövhəli məqalədə Bakıdakı kənd təsərrüfatı ilə bağlı statistik məlumatlar paylaşılıb. Müəllif qeyd edir ki, 2023-cü ilin altı ayında Bakıda kənd təsərrüfatı istehsalı üzrə məhsulun dəyəri 81 milyon manat təşkil edib ki, bu da ötən ilin eyni dövrü ilə müqayisədə 7,1% azalma deməkdir. Müəllif yazıda kənd təsərrüfatı ilə bağlı sahələr üzrə məlumatları da qeyd edib.

Trend. Az saytında yayımlanan “İyulda günvurma ilə əlaqədar qeydə alınan müraciətlərin sayı açıqlanıb” sərlövhəli yazıda günvurma ilə bağlı  statistik göstəricilər haqqında danışılıb.  Müəllif qeyd edir ki, Bakı Şəhəri Təcili və Təxirəsalınmaz Tibbi Yardım Stansiyasına ümumilikdə, 45 nəfər müraciət edib. Onlardan 21-i qadın, 24-ü kişi, 38 nəfəri böyük, 7-si isə uşaq olub. Müraciət edən böyüklərdən 9-u qadın, 7-si kişi olmaqla 16 nəfər, uşaqlardan isə 4-ü hospitalizasiya edilib.

Sosial media

Azadlıqradiosu

Fazil Qasımov 3 ay 12 gün həbs edilib- Yazıda Fazil Qasımovun həbsindən bəhs edilib. Müəllif qeyd edir ki, Qasımovun Azərbaycan Cinayət Məcəlləsinin 204.3.1-ci (mütəşəkkil dəstə tərəfindən saxta pul hazırlama) maddəsi ilə ittiham olunub. Müxalif siyasətçi Qubad İbadoğlu da eyni maddə ilə ittiham olunduğu qeyd olunub.

“Nərmin işi” üzrə yeni məhkəmə:”Nərminin atası kənddə yayıb ki, İlkinə ömürlük cəza veriləcək”- Müəllif qeyd edir ki, avqustun 8-də məhkəmədə məlum olub ki, Nərminin atası Şərif Quliyev də apellyasiya şikayəti verib. O, Süleymanova verilən cəzanın ağırlaşdırılmasını, onun ömürlük azadlıqdan məhrum edilməsini tələb edir. Ancaq o, şikayət verməkdən ötrü qanunda nəzərdə tutulan 20 günlük müddəti ötürdüyündən Apellyasiya Məhkəməsi bu iddiaya hökmü çıxarmış Gəncə Ağır Cinayətlər Məhkəməsinin qərar verməli olduğunu bildirib.

MeydanTV

Xəstəxanaya məcburi yerləşdirilən siyasi fəallar: “Onların azadlığı məhdudlaşdırılır”- Video materialda siyasi fəalların üzləşdiyi çətinliklər haqqında məlumat verilib. Video materialda fəalların etirazları göstərilib. Müəllif hüquqşünas və fəallarla söhbət edib.