Media-icmal 11.05.21

“Sfera.az” saytı “Azərbaycan vətəndaşlığını qəbul etməyən ermənilərə 6 ay vaxt veriləcək” sərlövhəli məqalədə Azərbaycan ərazisində yaşayan ermənilərin vətəndaşlığı qəbul etmədikləri halda sonrakı vəziyyətləri şərh edilir.

Politoloq Qabil Hüseynliyə görə, Azərbaycan vətəndaşlığını qəbul etməyən ermənilərə ölkəni tərk etmək üçün 3-6 ay vaxt verilə bilər. Ekspertə görə, Azərbaycan vətəndaşlığını qəbul etməyən ermənilərə müvəqqəti yaşayış hüququ verilə bilər, bundan da imtina edərlərsə o zaman ölkədən çıxarılmalıdırlar.   

Qabil Hüseynli deyir ki, bu proses zorla həyata keçirilmir, aidiyyatı beynəlxalq təşkilatlar məsələni nəzarətdə saxlayırlar, 6 aydan sonra isə Azərbaycan vətəndaşlığını qəbul etməyənlər ölkə hüdudlarını tərk etməlidirlər.

“Azpolitikainfo.az” saytı isə “Bu, atılmış və tənha Putin üçün final idi” - “Onun üçün yalnız İmaməli Rahmonla parad qəbul etmək alçaldıcıdır” sərlövhəli məqalədə müəllif mayın 9-da Moskvada keçirilmiş hərbi parada postsovet ölkələrindən yalnız Tacikistan prezidenti İmaməli Rəhmanın qatılmasını şərh edir.   

Müəllifə görə, belə siyasi mənzərənin yaranması Rusiyanın öz yaxın qonşularına və bütünlükdə dünya birliyinə qarşı yönələn xarici siyasətinin nəticəsidir.

Onun fikrincə, bu il keçirilən parad indiyə qədər olanların arasında ən “sönük” keçənidir, bu, heç də pandemiya ilə bağlı deyil.

Müəllifin deməsinə görə, bəzi politoloqlar yaranmış durumu acınacaqlı hesab edirlər və demək olar ki, artıq müttəfiqləri yoxdur.

Müəllif hesab edir ki, İmaməli Rəhmanın paradda iştirakı Putini dəstəkləməkdən daha çox Qırğızıstanla münaqişədə Rusiyanın dəstəyini qazanmağa hesablanmış addımdır.

“Mətbuat.az”  saytı “Ərdoğan Şuşaya bunun üçün gəlir - Putin və Paşinyanın planı alt-üst oldu” sərlövhəli məqalədə müəllif Türkiyə prezidenti Ərdoğanın bu il mayın ortalarında Şuşaya gözlənilən səfərini politoloq Məhəmməd Əsədullazadə ilə şərh edir.

Politoloqa görə, Ərdoğanın bu səfəri siyasi-strateji əhəmiyyət daşıyır, çünki Qarabağ məsələsini növbəti dəfə masaya gətirərək Fransa və Rusiya Azərbaycan əleyhinə oyun qurmağa cəhd edirlər.

Onun fikrincə, yenidən ermənilərin status məsələsini qaldırmaqla vəziyyəti mürəkkəbləşdirmək istəyirlər və Türkiyənin bu istiqamətdə Azərbaycana dəstək verməsi önəmlidir.

Politoloqa görə, bu dəstək  Azərbaycanın belə təhdidlərə duruş gətirmək və siyasi qələbəsini təmin etmək üçün vacibdir. Ona görə də bu səfərdən sonra Rusiya və Fransanın erməni separatizminə verdiyi dəstək uğurlu olmayacaq, Azərbaycan-Türkiyə tandemi Minsk Qrupunun fəaliyyətinə son verəcək.

“Sonxəbər.az” saytı isə “Koronavirus keçirən xəstələrin 80 faizi... – həkimdən şok” sərlövhəli məqalədə koronavirus keçirən xəstələrin 80 faizinin xəstəlikdən öncəki səviyyəyə qayıda bilməməsi müzakirə edilir. 

Müəllif  deir ki, bu barədə kardioloq, Rusiya Elmlər Akademiyasının müxbir üzvü, tibb elmləri doktoru Simon Matskeplişvili bildirib. Onun sözlərinə görə, koronavirus keçirən xəstələr çox vaxt özlərini tamamilə sağlam hiss etmədiklərindən şikayət edirlər.

Alim iddia edir ki, kiminsə yuxusu pozulur, kimlərdəsə baş və ya əzələ ağrıları, aritmiya və ürək-damar, mədə bağırsaq xəstəlikləri müşahidə olunur.

Beləliklə, postkoronavirus sindromu bir-biri ilə əlaqəsi olmadığı düşünülən çox geniş simptomları əhatə edir.