Prezident İlham Əliyev: “Hərbi əsirlər məsələsi qapanıb, revanş çağırışları isə Ermənistan üçün təhlükəlidir”

Bakı/11.05.21/Turan: İndiki münaqişədən sonrakı vəziyyət bütün səviyyələrdə daha sıx əlaqə saxlamağın zəruri olduğunu diqtə edir. Müsbət inkişaf, təhlükəsizliyin, sabitliyin möhkəmlənməsi, hərbi əməliyyatların yenidən başlanması risklərinin minimallaşdırılması və tariximizin bu qara səhifəsini çevirmək istəyi müşahidə olunur.  Bu barədə prezident İlham Əliyev dünən axşamdan keçmiş Rusiyanın xarici işlər naziri Sergey Lavrovu qəbul edərkən bildirib. 

O, nəqliyyat dəhlizlərinin açılması, dəmir yolu və avtomobil yolu infrastrukturunun bərpası üzrə üçtərəfli komissiyanın işini yüksək qiymətləndirib.

«Konkret müddətlər nəzərdə tutmuşuq və bu layihənin ən yaxın vaxtlarda reallaşması üçün həmin müddətlərə riayət etməyə çalışacağıq”, - İlham Əliyev deyib.

Daha sonra o, erməni hərbi əsirlər mövzusunu qapalı hesab etdiyini bildirib: Hərbi əməliyyatlar başa çatandan sonra bu 6 ay ərzində biz sülhməramlılarla və erməni tərəfin nümayəndələri ilə birlikdə işğaldan azad edilmiş ərazilərdə həlak olmuş 1600-ə yaxın erməni hərbi qulluqçunun cəsədlərini erməni tərəfə təhvil vermişik”.

“Biz hadisələrin gələcək inkişafının humanitar aspektini nəzərə alaraq Ermənistanın işğaldan azad edilmiş ərazilərdə avtomobil yolu boyunca yerləşən yaşayış məntəqələri arasında maneəsiz kommunikasiyanı təmin edirik, bu gün həmin avtomobil yolunun 20 kilometrdən çox hissəsi erməni vətəndaşların istifadəsindədir və bu məsələdə heç bir maneə və ya çətinlik yoxdur. Bu da Azərbaycan tərəfinin xoş məramının təzahürüdür”, - dövlət başçısı əlavə edib.

Bundan əlavə, Azərbaycan Rusiyadan Ermənistana qazın Azərbaycan ərazisindən nəql edilməsinə razılıq verib və bu da xoş məramdır.

Daha sonra Əliyev Ermənistanı revanş haqqında danışmaqda, itirilmiş ərazilərin qaytarılması cəhdlərində ittiham edib: “Bu, çox təhlükəlidir və ilk növbədə, Ermənistan üçün təhlükəlidir. Ona görə ki, bu nifrət və azərbaycanofobiya siyasətinin nəyə gətirib çıxarmasını İkinci Qarabağ Müharibəsi əyani şəkildə nümayiş etdirdi”, - Əliyev deyib və Rusiyanı vəziyyətin normallaşmasına yardımçı olmağa çağırıb.

“Biz ümid edirik, Rusiya bizim dostumuz, strateji tərəfdaşımız, qonşumuz kimi, sülhməramlıları bu gün Azərbaycan ərazisində olan ölkə kimi bundan sonra da gərginliyin azaldılmasına və erməni tərəfinin daha ayıq yanaşmasının üstünlüyünə şərait yaradacaq”, - o qeyd edib.

Sergey Lavrov cavab sözündə deyib ki, Rusiya 9 noyabr və 11 yanvar bəyanatları çərçivəsində Qarabağ nizamlanması üzrə razılaşmaların yerinə yetirilməsinə sadiqdir.

“Bizim sülhməramlı kontingentimiz sizin Rusiya və Ermənistan rəhbərliyi ilə həmin əlaqələrinizin gedişində razılaşdırdığınız vəzifələri yerinə yetirir. Bizim sülhməramlıların rolunu yüksək qiymətləndirdiyinizə görə sizə minnətdarıq. Sizin vurğuladığınız kimi, biz hər şeyi edəcəyik ki, hamı münaqişənin hərbi aspektlərinin başa çatmasını əsas götürsün. İndi torpaqda detallarla məşğul olmaq lazımdır. Orada delimitasiya, demarkasiya ilə bağlı məsələlər var. Bu məsələlərin hamısı asan deyil, lakin hamısı həll edilə biləndir. Biz əminik ki, hərbi ekspertlər diplomatların iştirakı ilə qarşılıqlı məqbul qərarlar barədə razılığa gələ biləcəklər”, - o deyib.

Humanitar məsələlərin həlli məqsədilə Rusiya Humanitar Müşahidə Mərkəzi Azərbaycan Fövqəladə Hallar Nazirliyi ilə birlikdə Qarabağda işləyir.

Rusiya, Azərbaycan və Ermənistanın baş nazirlərinin müavinləri işçi qrupu çərçivəsində müntəzəm olaraq görüşür, Cənubi Qafqazda bütün iqtisadi və nəqliyyat kommunikasiyalarının bərpası ilə əlaqədar praktiki aspektləri nəzərdən keçirirlər. Cənubi Qafqaz dövlətlərinin və onların qonşularının maraqlarına uyğun olaraq bu kommunikasiyaların açılması qlobal xarakter daşıyan ciddi nəqliyyat xabının yaradılması deməkdir.

“Siz hərbi əsirləri, tarixi irs ilə, dini irs ilə bağlı hər hansı sui-istifadə hallarına yol verilməməsini xatırlatdınız. Biz bütün bu məsələlərin maksimum konstruktiv şəkildə həllinə kömək etməyi çox istəyirik. Beynəlxalq mədəni irsin qorunub saxlanmasına cavabdeh olan təşkilat kimi YUNESKO da bu səylərdə iştirak etməkdə maraqlıdır. Biz bunu mümkün edəcək şəraitin yaradılmasına kömək etməyə hazırıq”, - Lavrov deyib.

Sonda o əlavə edib ki, Rusiya öz şirkətlərini azad edilmiş ərazilərdə bərpa işlərində iştiraka hər cür təşviq edəcək.02D-