Lavrov Bakıda

Bakı/10.05.21/Turan: Rusiyanın Xarici İşlər Naziri Sergey Lavrov mayın 10-da axşam Bakıya gəlib. Elə bu gün isə Prezident İlham Əliyevlə görüşür.

Mayın 11-də Rusiya XİN başçısı azərbaycanlı həmkarı Ceyhun Bayramovla danışıqlar aparacaq.

Rusiya Xarici İşlər Nazirliyinin səfərlə bağlı məlumatında deyilir: "Rusiya tərəfi Azərbaycanla münasibətlərin bütün inkişaf spektri üzrə - siyasət, iqtisadiyyat, mədəniyyət sahəsində, humanitar sahədə açıq və qarşılıqlı hörmətə əsaslanan dialoqu davam etdirmək niyyətindədir. 

Rusiya, Azərbaycan və Ermənistan liderlərinin 9 noyabr 2020-ci il və 11 yanvar 2021-ci il tarixli bəyanatlarının hərtərəfli həyata keçirilməsinə xüsusi diqqət yetiriləcək. Dağlıq Qarabağda vəziyyətin, Dağlıq Qarabağ nizamlanmasının humanitar aspektlərinin, münaqişədən sonra bərpa və dinc həyatın qurulması məsələlərinə nəzər salınması planlaşdırılır. Əsas vəzifələr arasında regionda bütün nəqliyyat əlaqələrinin və iqtisadi əlaqələrin açılması da var". 

Azərbaycan və Rusiya xarici siyasət idarələrinin rəhbərləri əsas regional və beynəlxalq birliklərin - Müstəqil Dövlətlər Birliyi, Birləşmiş Millətlər Təşkilatı, Qoşulmama Hərəkatı, Avropa Şurası, Qara Dəniz İqtisadi Əməkdaşlıq Təşkilatı çərçivəsində qarşılıqlı fəaliyyətin əlaqələndirilməsi məsələlərini müzakirə edəcəklər. 

"Regionda qüvvələr balansının qorunub saxlanması zərurəti nəzərə alınmaqla qurulan Rusiya-Azərbaycan hərbi-texniki əməkdaşlığı əhəmiyyətli xarakter daşıyır".—0—