Dağlıq Qarabağ adlı ərazi vahidi yoxdur, Zəngəzur dəhlizi açılacaq, Kanada və Fransa isə öz işləri ilə məşğul olsunlar - İlham Əliyev

Bakı/10.05.21/Turan: Dövlət başçısı İlham Əliyev bu gün Naxçıvana səfəri zamanı Qarabağ məsələsi ilə bağlı bir sıra sərt bəyanatlar səsləndirib. 

AZTV dövlət televiziyasına müsahibəsində o bildirib ki, Qarabağ münaqişəsi döyüş meydanında həll olunub və məsələ həllini tapıb. "Azərbaycan ərazisində Dağlıq Qarabağ adlı ərazi vahidi yoxdur", deyə o bildirib. 

"Əgər bu münaqişə həll olunmayıbsa, onda bu münaqişənin həlli necə olmalıdır? O deməkdir ki, noyabrın 10-da imzalanmış Bəyanat qüvvəsini itirib?", deyə Əliyev bildirib.

Bu məsələ ilə məşğul olmaq istəyən ölkələr də bunu nəzərə almalıdırlar. "Bu yaxınlarda mənə məlumat verildi ki, Kanadanın Xarici İşlər Nazirliyi Azərbaycanla, bizim daxili işlərimizlə bağlı bəyanat verir. Nə haqqı var? Kim buna belə bir haqq verib? Özünü nə sayır Kanada? Bəlkə bu, superdövlətdir biz bilməmişik. Bu, bəlkə ikinci Lüksemburqdur, ikinci superdövlət yaranıb, bunu bilməmişik", deyə o Kanada xarici işlər nazirliyinin saxlanılan ermənilərlə bağlı son bəyanatını şərh edərkən bildirib.

"Mən Fransa Xarici İşlər Nazirliyinin bəyanatını da rədd edirəm. Bu, qəbuledilməzdir... Getsinlər, öz işləri ilə məşğul olsunlar. Bu Hərbi Qənimətlər Parkı ilə Azərbaycana qarşı aparılan çirkin kampaniyaya son qoyulmalıdır. Fransa muzeyində Əlcəzair Milli Müqavimət Hərəkatının öldürülmüş öndərlərinin kəllələri nümayiş etdirilir. Bir gedin baxın, güzgüyə baxın", deyə Əliyev qeyd edib. 

"Ermənistanda nə güc var, nə iradə var, nə hər hansı bir mənəvi haqq var ki, revanşist fikirlərlə yaşasın. Bu, onlar üçün özünəqəsddir. Bir daha demək istəyirəm, biz hələ ki, bu bəyanatları izləyirik. Ermənistanda həm iqtidar, həm də müxalifət, demək olar ki, siyasətlə məşğul olan bütün ünsürlər Şuşanın qaytarılması ilə bağlı, Hadrutun qaytarılması ilə bağlı fikirlər səsləndirirlər... Onlar bizim yumruğumuzu görüblər. Bu yumruq yerindədir. Heç kim bizim qabağımızda dura bilməz. Əgər biz zərrə qədər təhlükə görsək, - zərrə qədər, - onları dərhal məhv edəcəyik", deyə Əliyev təhdid edib. 

Zəngəzur dəhlizinə gəlincə, o, açılacaq. "Mən təsadüfən Ordubad dəmir yolu stansiyası ilə tanışlığa gəlməmişəm. Bu yaxınlarda buradan təqribən 50-60 kilometr uzaqlıqda yerləşən Mincivan qəsəbəsinin ermənilər tərəfindən dağıdılmış dəmir yolu stansiyasına baxış keçirdim. Orada dəmir yolu mövcud deyil. Mənfur düşmən bütün dəmir yolu infrastrukturunu dağıdıbdır, talan edibdir. Orada bir mərkəz olacaq, burada bir mərkəz olacaq. Zəngilanı Naxçıvanla ayıran cəmi 40 kilometrlik Zəngəzur dəhlizidir, hansı ki, açılmalıdır və açılacaqdır", deyə Əliyev qeyd edib. 

O, həmçinin Naxçıvanın müdafiə qabiliyyətinə toxunub, orada yerləşən Ümumqoşun Əlahiddə Ordunun ən yüksək döyüş qabiliyyətinə və ən yeni növ silahlara malik ordulardan biri olduğunu vurğulayıb. Bu ordunun imkanları hələ 2018-ci ildə keçirilmiş uğurlu əməliyyat zamanı özünü büruzə verib: "Biz çox önəmli strateji yüksəklikləri Ermənistan ordusundan təmizlədik, o yüksəklikləri əldə etdik. Bu yüksəkliklər imkan verdi ki, biz artıq strateji kommunikasiyalara tam nəzarət edirik və Ermənistandan Dağlıq Qarabağa gedən yola da nəzarət edirik", deyə Əliyev qeyd edib. -02В-