Deputat miqrantların Rusiyadan deportasiyası barədə

2025-ci ildə Rusiyada miqrasiya siyasəti sahəsində qanunvericilik sərtləşdirilib. Yeniliklərdən biri də əcnəbilərin vizasız qalma müddətinin 180 gündən 90 günə endirilməsidir.

Fevralın 5-dən qeyri-leqal miqrantların deportasiyası prosesi sadələşdirilib. Deportasiya olunanların arasında Azərbaycan vətəndaşları da var.

Milli Məclisin Əmək və sosial siyasət komitəsinin sədr müavini Elşad Musayev Turan-ın müxbirilə söhbətində deyib ki, Rusiyanın miqrasiya ilə bağlı addımları həm iqtisadi, həm də siyasi xarakter daşıyır.

"Onlar nədənsə narazı olanda dərhal miqrantlarla bağlı əlavə qanunlar qəbul edirlər və ya mövcud qanunlarda dəyişiklik edirlər. Ancaq ehtiyac olarsa, qanun qəbul edilsə belə, buna göz yumurlar", - deputat deyib.

Deputat hesab edir ki, Rusiyada miqrantlar məsələsindən MDB ölkələrinə təzyiq vasitəsi kimi istifadə olunur. "Onlar miqrantlar vasitəsilə ölkələrə təsir, təzyiq etmək istəyirlər. Azərbaycanlılar Rusiyada yaşayırlar, amma onların böyük bir hissəsi Rusiya vətəndaşlığını alıb. Azərbaycan vətəndaşı olan miqrantlara gəlincə, onlar ölkəyə qayıtmaq istəyirsə, Azərbaycan dövləti onlar üçün şərait yaradacaq”, - deputat hesab edir.