Turan gedərsə…

Təranə Sabirqızı, tərcüməçi

Bütün agentliklərin, idarə və müəssisələrin adlarını dırnaq içində yazdığım halda, bir tək Turan-ı heç vaxt dırnaqda yazmadım. Yazılarda Turan-ı dırnaq içində gördüyümdə dırnaqdan çıxardım. Turan sözünü hallandırarkən yazı qaydalarını pozaraq hal şəkilçisini Turan-a birləşdirmədim, defislə yazdım. Turan-ı ayırmaq üçün.  Çünki Turan heç zaman dırnaq içində, sıradan biri olmadı.  Vicdanlı, ləyaqətli, düzgün, peşəkar insanları birləşdirən məkan oldu Turan İnformasiya Agentliyi. Bəzən özümə sual verirdim:  Ölkənin ən yaxşı adamları Turan-da toplaşdılar, yoxsa Turan-da çalışdıqları üçün ən yaxşılardan olmağa məcbur buraxıldılar? 

Turan ailə oldu. Hər kəs bir-birini ailədən bildi, ailə üzvü kimi sevdi, dəstək oldu, kədərini, sevincini paylaşdı. Qurumların çoxunun bir nömrəli işi olan donosçuluq, söz gəzdirmək, bir-birinə badalaq vurmaq, rəhbərliyə yaltaqlıq və köləlik Turan-da olmadı. Çünki Mehman müəllim sistemi belə qurdu. Biz Mehman müəllimi direktor olduğuna görə sevmədik, xarakterinə, mərdliyinə, dik duruşuna, ləyaqətlilik simvolu olduğuna görə sevdik.

Turan təkcə xəbər müəssisəsi olmadı. Məzlumların, köməksizlərin, haqsızlığa uğrayanların ümid yeri oldu. Məhkəmələrin ədalətliliyindən, məmurların adil davranışlarından əlini üzənlər üzünü Turan-a tutdu. Turan bu insanları dinlədi, səslərini bacardığı ən yüksək yerlərə çatdırdı, dərdlərinə çarə aradı.

Ədalətsizliyin, haqsızlığın baş alıb getdiyi, günahsız adamların – kimliyindən asılı olmayaraq, istər sadə vətəndaş olsun, istər jurnalist, dindar, məmur - şərlənib tutulduğu dönəmlərdə Turan qorxmadan, çəkinmədən onların yanında oldu, məhkəmə proseslərini işıqlandırdı, ailələrinə dəstək oldu, hökumət nümayəndələrini qarşısına aldı.. 

Turan-ın qapısı o qapını ümidlə döyən hər kəsin üzünə açıq oldu..

Turan gedərsə, bu insanların ümidi kəsilər, ailələrinin ümid qapısı bağlanar..

Turan gedərsə, jurnalistikada düzən pozular..

Turan gedərsə, yetişməkdə olan jurnalistlər örnək götürməyə jurnalistika məktəbi bulmazlar..

Turan gedərsə, vətəndaşlar ölkədə gerçəkdən nələrin baş verdiyindən xəbərsiz qalar..

Turan gedərsə, ölkədə müstəqil səs olmaz, danışacaq kimsə qalmaz..

Che Guevaranın bir fikrini çox sevirəm və öz həyatımda tətbiq etdiyim üçün rahat yaşayıram: Həyatda daima həqiqəti müdafiə et. Təqdir edən olmasa belə, vicdanına hesab verməkdən qurtulursan..

Bu gün Turan-ın kimsəyə verəcək bir hesabı yoxdur, çünki vicdanı təmizdir və rahatdır..