Cəmil Həsənli: Öz yolundan dönməyənlər

Turan İA-nin öz fəaliyyətini dayandırması haqqında məlumat son dərəcə üzücüdür. Müstəqil, doğru, tərəfsiz xəbərin, təhlilin, mövqeyin ünvanı olan Turan 35 ildir fəaliyyət göstərib. Qanlı-qadalı 1990-cı ildə fəaliyyətə başlayan bu media qurumu XXI əsrin 3-cü onilliyində - yəni 2025-ci ilin fevral ayında maliyyə çətinliyindən öz fəaliyyətini dayandırır.

Şübhəsiz ki, səbəb yalnız maliyyə çətinliyi deyil, bu çətinliyi yaradan siyasətdir, mühitdir, mətbuatın, azad sözün təqibidir. Həyatımın bir hissəsi Turanla bağlıdır, Çoxlu silsilə yazılarım, məqalələrim, təhlillərim, müsahibələrim, nəşr olunan kitablarım haqqında ilk məlumatlar Turan-da çıxıb. Yəni əslində Turan mənim həyatımın 35 illik bir dövrünün tarixçəsidir. Necə maraqlı bir layihələr işlədik Turanda və bütün bunlar indi keçmişdə qaldı. Turan Azərbaycan tarixinin 35 illik bir aynasıdır. Düzü düz, əyrini əyri göstərən bir ayna. İndi bu aynanın qapanması kədərli mənzərədir.

Beş il bundan əvvəl 2020-ci ilin may ayının 7-də Turanın 30 yaşı tamam olanda bu yazını yazmışdım. Sözardı olaraq onu bu gün bu acı xəbərin təəssüratı altında Turansevərlərlə bölüşürəm

"Turan"ın 30 yaşı tamam oldu. Azərbaycan şəraitində öz sözü, öz səsi, öz siması olan bir informasiya qurumunun 30 il yaşaması möcüzə kimi görünür. Kiçik istisnalarla bu 30 ildə "Turan" ardıcıl və davamlı olaraq fəaliyyət göstərib və onun fəaliyyəti cəmiyyətin fikrinin və məramının cilalanmasında əvəzsiz rol oynayıb.

Bu illər ərzində çox şey dəyişdi, çoxlarının sığınmadığı qoltuq (həm də kreslo demək istəyirəm) qalmadı, fəqət "Turan" təmkinini pozmadı, öz prinsiplərinə sadiq qaldı, öz yolunu davam etdirdi. Bu yol Azərbaycan mətbuat tarixinə heç şübhəsiz ki, "Turan" yolu kimi daxil olacaq, əslində isə olub.

Son 30 ilin təlatümləri içərisində "Turan" yalnız ölkəmizdə deyil, beynəlxalq aləmdə də doğru xəbər, obyektiv informasiya, gercək təhlil mənbəyi kimi tanınıb, bu etibarı qazanıb. Həmin etibarın əməli nəticələrini biz yaxın keçmişdə agentliyin rəhbəri Mehman Əliyevin saxta bir ittihamla həbs edildiyi zaman gördük. Şübhəsiz ki, belə bir eimad sahibi olmaq "Turan"ın böyük sərvətidir, onun yaradıcı kollektivinin böyük uğurudur.

Uzun illərdir bu agentliklə əməkdaşlıq etmişəm və bundan qürur duyuram. Tələbkar "Turan"ın etibarını qazanmaq tək insanların deyil, dəyərlərin, prinsiplərin, talelərin dəyişdiyi çağdaş zəmanəmizdə özü də bir dəyərdir. "Turan"ın ən böyük uğuru onun davamlı olaraq haqqın yanında dayanması və haqqa tamınmağı özünün həyat amalına çevirməsidir. Bir informasiya orqanı kimi "Turan" hekayəsi həqiqətdən keçir, onu bu 30 il ərzində yaşadan da, güvən yerinə çevirən də, sözünü təpərli, simasını etibarlı edən bu HƏQİQƏTDİR!