Media-icmal 12.08.20

“Yenisabah.az” Azərbaycanda yenidən devalvasiyanın gözlənilməsi ehtimalını gündəmə gətirir. Bu məsələ deputat Vahid Əhmədovla müzakirə edilir.

V.Əhmədov deyir ki, manatın tam üzən məzənnəyə keçməsi gec-tez olmalıdır və pandemiya olmasa idi Mərkəzi Bank və Nazirlər Kabineti artıq müəyyən addımlar atmış olacaqdılar.

O hesab edir ki, birbaşa keçid olsa sahibkarlar, eləcə də əhali bir sıra problemlərlə üzləşə bilər və indiki vəziyyətdə tam üzən məzənnəyə keçid o qədər də asan məsələ deyil: “Pandemiya qurtarandan sonra vəziyyətə baxarıq. Mənə elə gəlir ki, hələlik Mərkəzi Bank da, hökumət də manatın məzənnəsinin hazırkı səviyyədə saxlanılmasının üzərində dayanıblar”.

V.Əhmədov müəyyən müddətdən sonra milli valyutanın ABŞ dolları qarşısında dəyər itirmə ehtimalından da danışıb: “Əlbəttə, manatın taleyi bizi narahat edir. Çünki neftin qiyməti o qədər də yüksək deyil”.

Deputat deyir ki, xüsusən də qeyri-neft sektorunda pandemiya ilə əlaqədar xeyli problemlər var.

Amma karantin rejimi yumşalmaları ilə müəyyən istehsal sahələrində fəaliyyət balaya bilər, belə halda dolların manata nisbətdə dəyər qazanması da istisna deyil.

Onun fikrincə, amma hökumət qabaqlayıcı addımlar atarsa, bunun qarşısını almaq olar.

“Redaktor.az” isə Bakının Masazır qəsəbəsindəki natəmizlikdən yazır. “Masazır küçələri zibillə doludur... - Bələdiyyə nə işlə məşğuldur? deyə müəllif sual ünvanlayır.

Müəllif iddia edir ki, son zamanlar qəsəbə küçələrində üfunət iyindən dayanmaq mümkün deyil, buna səbəb isə həftələrlə zibillərin ərazidən daşınmamasıdır.

Yazı müəllifi deyir ki, qəsəbə bələdiyyəsinin əməkdaşları hər ay qapı-qapı düşüb 4 manat yığırlar ki, zibili həftədə 3 dəfə aparacağıq, amma artıq iki həftədir deyilən sözə əməl edilmir.

Müəllif deyir ki, hətta qəsəbənin bəzi küçələrində şikayətlər də olub, bələdiyyə öz işini yerinə yetirməməkdə təqsirləndirilib.

Sakinlər indiki pandemiya şəraitində natəmizlikdən daha çox ehtiyat edirlər ki, bu da əlavə xəstəlik mənbəyinə dönə bilər. Sakinlər deyirlər ki, bələdiyyələrə müraciət etsələr də tədbir görən olmayıb.

Masazır kənd İcra nümayəndəliyinin təmsilçiləri isə məsələnin araşdırılacağını və qısa zamanda ərazidən zibillərin təmizlənəcəyini bildirib.

Amma qəsəbə küçələrinin sakinləri şikayətlərini davam etdirirlər.

İcra nümayəndəliyindən bildiriblər ki, bələdiyyəyə verilən texnikanın az sayda olması problem yaradır, amma bu qəsəbənin natəmiz saxlanmasına əsas vermir.

“Mətbuat.az ” isə “Azərbaycanda 32921 narkotik istifadəçisi qeydiyyatdadır” deyə onların sayı barədə məlumat verir.

Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupundan verilən məlumata görə 2019-cu ildə 4536 fakt üzrə ümumi çəkisi 3 ton 508 kq. müxtəlif növ narkotik vasitə, psixotrop maddələr qanunsuz dövriyyədən çıxarılıb və 3487 nəfər cinayət məsuliyyətinə  cəlb edilib.

2020-ci ilin 6 ayı ərzində aşkar edilmiş 2893 fakt üzrə ümumi çəkisi 2 ton 309 kq. müxtəlif növ narkotik vasitə, psixotrop maddələr qanunsuz dövriyyədən çıxarılıb və 1933 nəfər  cinayət məsuliyyətinə  cəlb edilib.

Qeydiyyatda olan narkotik maddə istifadəçilərinin ümumi sayı 32921 nəfərdir.

Onlardan 27574 nəfəri dispanser, 5347 nəfəri profilaktik qeydiyyatda olanlardır. Qadınların ümumi sayı  641 nəfərdir.