Media-icmal 14.04.21

Ermənilərin Xankəndinə gətirilmələrinin səbəbləri, fermerlərə satılan inəklərin baha olması iddiası, toyların keçirilməsinə yanaşma tərzi və s. məsələlər bugünküo medianın aparıcı mövzuları sırasındadır...

“Müsavat.com” saytında “Erməniləri Xankəndinə niyə zorla yerləşdirirlər?” sərlövhəli məqalədə verilən suala cavab axtarılır.

Müəllifin sözlərinə görə, Rusiya sülhməramlılarının dəstəyi ilə Azərbaycana qaytarılan ermənilərin sayının 50 min, müstəqil mənbələr isə ən yaxşı halda 30 min civarında olduğunu bildirirlər.

Müəllif deyir ki, əsas məskunlaşma Xankəndindədir və bura qayıdanlar ciddi problemlərlə üzləşirlər, ən başlıcası, qayıdan ermənilər ümidsizdirlər, bu səbəbdən

Qarabağdan ermənilərin qaçışı gözləniləndir.

Keçmiş baş nazir Pənah Hüseyn hesab edir ki, Xankəndinə köçürülən ermənilərin bütün kommunal xidmətləri pulsuzdur və bu, haradansa gələn vəsait hesabına ödənilir.

P.Hüseyn vurğulayır ki, Xankəndində iş yeri də yoxdur, sanki onlara muzdlu kimi pul verilir, “sən qarabağlısan, burada qalmalısan” prinsipilə hərəkət edirlər.

“Bunu da status məsələsinə görə edirlər. Referendum məsələsini, Minsk məsələsini yenidən diriltmək istəyirlər. Zorla Azərbaycanın ərazisinə onun suverenliyinin qaytarılmaması üçün cəhdlər gedir”, deyə P.Hüseyn bildirib.  

“Yenisabah.az” saytı “Nazirlik fermerlərə maşın qiymətinə inək satır” sərlövhəli məqalədə Ümid partiyasının sədri İqbal Ağazadənin fikirlərinə yer verib.

İ.Ağazadə iddia edir ki Kənd Təsərrüfatı Nazirliyi (KTN) damazlıq heyvan, kənd təsərrüfatı texnikası və gübrənin qiymətini şişirdərək pul mənimsəyir. Öz növbəsində nazirlik isə bu iddiaları əsassız adlandırır.

Siyasətçi KTN-in cinayətlərilə bağlı materialları Baş Prokurorluğa göndərəcəyini bildirib.

“Biz onların cinayətlərinin hamısını Baş Prokurorluğa göndərərik, orada cavab verərlər. Hesab edirlər ki, Baş Prokurorluq susur, ölkədə korrupsiya mühiti var deyə dediyimiz faktların üzərindən keçiləcək?”.

O, heyvanların şişirdilmiş qiymələrlə satılmasının da sənədə əsaslandığını diqqətə çatdırıb: “Heyvanlarla bağlı dediklərimizin əsassız olduğunu iddia edirlər. Ortada sənədlər var. Fermerlərdə sənədlər var, baxın inəyi neçəyə satırlar və burada arqumentsizlik mümkün deyil. Adam 6700 manata inək alıb, onun da 60%-ni dövlət ödəyir. Maşın almırlar, motoru filan yoxdur, inəkdir bu, Simmental cinsli Avstraliya inəklərindən söhbət gedir”.

“Yeniavaz.com”  saytında  “Deputatdan toylarla bağlı təklif: Bəy və gəlinin adına bankda hesab açılsın...” sərlövhəli məqalədə toyların keçirilməsi qaydaları ilə bağlı müəllif deputat Fazil Mustafa ilə söhbətləşir. 

Müəllif deyir ki, qadağalara, yüksək cərimələrə baxmayaraq, icazəsiz toylar keçirilməsi davam edir və toyları qadağa altında saxlamaq çıxış yolu deyil.     

Deputat F.Mustafaya görə, pandemiyaya qədər Azərbaycanda keçirilən toylar şadlıq evlərini doydurmaq vasitəsi, insanların soyulma mexanizmi idi.

Deputata görə, indiki halda toylara həmin köhnə üslubdan yanaşmaq olmaz. “Bizim yanaşmamız odur ki, 10, 20, 30 ya 50 nəfərlə olsun toyların keçirilməsinə icazə verilməlidir. Bu, pandemiya ilə bağlı qadağalara sərt şəkildə əməl olunmasına nəzarət etməklə icra oluna bilər. Amma toyları birbaşa qadağa etmək gələcək demoqrafik problemlərə, sosial narazılığa, ailəiçi münasibətlərin pozulmasına yol açacaq”, deyə deputat mövqeyini bildirir.

Onun fikrincə, ofisiant, müğənni, xidmətçi və s. hər kəs daxil olmaqla ümumilikdə 30-40 nəfərdən ibarət toylara icazə verilməli, bəy və gəlinin adına bankda hesab açılmalıdır

Deputat hesab edir ki, insanları evinə qapadıb, işləmələrinə mane olunursa, o zaman onların maddi təminatı ödənilməlidir, bunu etmək üçün böyük imkan yoxdursa, o zaman qadağan etmək olmaz, çünki insanlar narazı olacaqdır. Qadağa çıxış yolu deyil, mütləq çıxış yolu tapılmalıdır.