Media-icmal 14.10.20

Ordu quruculuğundakı uğurlar, hava hücumlarından qorunma ətrafında mülahizələr, Rusiyadan Ermənistana muzdlu döyüşçülər göndərilə bilməsi mümkünlüyü, Rusiyaya məxsus  “Sberbank”ın terror maliyyələşdirməsi iddiaları və s. məsələlər medianın aparıcı mövzuları sırasındadır… 

“Azərbaycan” qəzeti  “Qlobal layihələr, güclü iqtisadiyyat, yenilməz ordu...” sərlövhəli məqalədə Azərbaycanda ordu quruculuğunu və hərbi uğurları dəyərləndirir.

Müəllif deyir ki, Azərbaycanın icra etdiyi neft-qaz və ixrac layihələri ölkəni iqtisadi baxımdan güclü dövlətə çevirdi.

Müəllif vurğulayır ki, neft gəlirlərindən əhalinin sosial vəziyyətinin yaxşılaşdırılmasından tutmuş ordunun güclənməsinə kimi bütün istiqamətlərdə istifadə edildi. Azərbaycan torpaqlarının 20 faizinin işğal altında olması bunu gündəmə təxirəsalınmaz bir vəzifə kimi gətirirdi, odur ki, ordu quruculuğuna böyük diqqət yetirildi.

Müəllif “Global Firepower 2019” hesabatına istinadən deyir ki, dünyanın ən güclü orduları reytinqində Azərbaycan 52-ci, Ermənistan 96-cı yerdədir və bütün parametrlər üzrə Azərbaycan ordusunun üstünlükləri hesabatda qeyd edilir.

Müəllif vurğulayır ki, bu il sentyabrın 27-dən başlayaraq düşmən hücumunun qarşısının alınması məqsədi ilə həyata keçirilən əks-hücum əməliyyatları deyilənlərin əyani sübutudur. Qısa bir müddətdə çoxsaylı yaşayış məntəqələrini düşmən tapdağından azad edən ordu, əlbəttə ki, işğalda olan bütün torpaqları geri ala bilər.

Prezident sentyabrın 27-də, oktyabrın 4-də və 9-da xalqa müraciətlərində, eləcə də bu dövrdə müxtəlif xarici telekanallara müsahibələrində Azərbaycan Ordusunun nəyə qadir olduğunu dönə-dönə qeyd edib.

Müəllif deyir ki, Azərbaycan Ordusu dünyada 50 ən güclü ordu sırasındadır, bunun əsasını həyata keçirilən qlobal layihələr, güclü iqtisadiyyat təkil edir ki, yenilməz ordu formalaşır.

“Redaktor.az” saytı “Gəncəyə atılan raket havada vurula bilərdimi? – ekspert rəyi” sərlövhəli məqalədə oktyabrın 11-i gecə saatlarında Gəncəyə atılmış raketlərin havada zərərsizləşdirilməsinin mümkünlüyü barədə ekspert Abuzər Əbilovla söhbətləşir.

“Legion” hərbi vətənpərvərlik klubunun rəhbəri, hərbi ekspert A.Əbilov bildirib ki, hazırda dünyada yerdən atılan, idarə olunmayan mərmilərin tamamilə məhvi çətindir: “Ümumiyyətlə, belə bir texnologiya mövcud deyil. Bu sahədə irəli getmiş İsrail dövləti “Dəmir Gümbəz” qurğusundan istifadə edir. Amma, buna baxmayaraq, həmin qurğudan idarə olunmayan mərmi, yaxud raketlərin keçməsi halları da qeydə alınıb. Demək olar ki, belə qurğuların işləkliyi 75-80 faiz təşkil edir. Yəni, hər zaman tam müdafiə mümkün deyil”. 

Gəncəyə düşən raketlərə gəlincə, ekspertə görə, heç biri zərərsizləşdirilməyib deyilsə, bu, yalan olar: “Ora atılan mərmilərin sayı bilinmir, neçəsi zərərsizləşdirilib bu barədə heç kəs dəqiq rəqəm deyə bilmir”, deyə A.Əbilov bildirib.

Onun fikrincə, Mingəçevirə hər hansı bir raket düşsə, bura dəyən ziyan Gəncəyə dəymiş ziyandan 2 dəfə çox, hətta təbii fəlakət ola bilər.

“Amma ermənilər buna çox da arxayın olmasınlar, ona görə ki, hər hansı blok partlasa, işığın verilməsi bir müddətlik dayansa belə, yenidən bərpa olunar. Amma bəndi vurmaq mümkün deyil, çünki həmin ərazinin təməli sovet dövründən qoyulub və tamamilə nüvə həmləsinə də davamlıdır”.

“Modern.az” saytı isə “Rusiyadan Ermənistana muzdlu döyüşçülər göndərilə bilər” sərlövhəli məqalədə müəllif Qarabağ cəbhəsində ermənilərin canlı qüvvə çatışmazlığı ilə üzbəüz qaldıqlarını bildirir.

Müəllifin sözlərinə görə, Qarabağ cəbhəsində ciddi məğlubiyyətlərə uğrayan Ermənistan əsgər qıtlığı ilə üzləşib.

Müəllif vurğulayır ki, problemi aradan qaldırmaq üçün Ermənistan xüsusi xidmət orqanları muzdlu döyüşçülərin Qarabağa göndərilməsi üçün  Rusiya ərazisindəki erməni diaspor üzvləri ilə birgə fəaliyyətə başlayıb.

Müəllif əlavə edir ki, Rusiya ermənilərinin Moskvada fəaliyyət göstərən “Sebastiya” İdman Klubu Qarabağa könüllü və muzdlu döyüşçülər göndərmək üçün yeni kampaniyaya başlayıb, prosesə əslən Qarabağdan olan Rusiya vətəndaşı Armen Buşants rəhbərlik edir. Müəllifin sözlərinə görə, Rusiyada ermənilər arasında hərbi-taktiki oyunlar təşkil edən “Sebastiya” klubuna başçılıq edən 36 yaşlı Armen Buşants yaşı 18-dən yuxarı olan bütün şəxsləri təlimə dəvət edib: “Erməni xüsusi xidmət orqanları ilə əlaqədə olan Buşantsın Moskvadan Yerevana uçan təyyarə reysləri vasitəsilə 10-larla  döyüşçünü Ermənistana yola salması ehtimalı yüksəkdir.

“Bizimyolinfo.az” saytı “Sberbank” çirkli pulların yuyulması və terrorçuluğun maliyyələşdirilməsilə məşğuldur” sərlövhəli məqalədə Rusiyada fəaliyyət göstərən “Sberbank”ın terroru maliyyləşdirdiyini bildirir.

Bu fəaliyyətin Azərbaycanla əlaqəsinə gəlincə, müəllif Azərbaycan Mərkəzi Bankına istinadən deyir ki, aparılmış monitorinqlər zamanı Azərbaycanın Dağlıq Qarabağ bölgəsində separatçılıq yolu ilə yaradılmış, dünya ictimaiyyətinin tanımadığı qondarma “Dağlıq Qarabağ Respublikası” üçün yardım toplanması prosesində bu bank da iştirak edir.

“Müəyyən edilib ki, sözügedən yardımlar “Sberbank”da olan müxbir hesabları vasitəsilə müxtəlif valyutalarda “Donation We and our borders”, “Финансовая помощь Мы и наши границы”, “Арцах” və ya “Artsakh” təyinatları adı altında həyata keçirilir”, deyə müəllif bildirir.

Bank məsələləri üzrə ekspert, hüquqşünas Əkrəm Həsənov hesab edir ki, “Sberbank”ın bu istiqamətdə fəaliyyətilə bağlı Azərbaycan hökuməti qarşı tərəfə etirazını bildirməli və Azərbaycan bankları sözügedən bankla əməkdaşlığı dayandırmalıdır.

Ə.Həsənov deyir ki, “Sberbank” özəl bank deyil, dövlət bankıdır. Bu bankın qondarma “Dağlıq Qarabağ Respublikası” ilə hər hansı şəkildə əməkdaşlıq etməsi qanunsuzdur və Azərbaycan hökuməti buna etirazını bildirməlidir.

Ekspertə görə, Azərbaycan bankları “Sberbank”la bütün əməkdaşlığa son qoymalıdır.

Ə.Həsənov əlavə edir ki, Rusiyanın digər dövlət bankı olan “Bank VTB”nin Ermənistandakı bankının Dağlıq Qarabağda filialı vardı. “Bank VTB” o vaxt Azərbaycan bazarına daxil olmaq istəyəndə onun qarşısına şərt qoyuldu ki, Dağlıq Qarabağda filialı bağlanılsın və bağlanıldı. Yalnız bundan sonra Azərbaycan “Bank VTB”nin Azərbaycanda fəaliyyət göstərməsinə icazə verildi”, deyə Ə.Həsənov bildirib.

Ə.Həsənov deyib ki, “Sberbank” bu fəaliyyətilə çirkli pulların yuyulması ilə məşğuldur: “Yəni qondarma “Dağlıq Qarabağ Respublikası” qanunsuz olduğu üçün bu yerlə bağlı dövriyyədə olan pulların hamısı çirkli pullardır. Biz beynəlxalq maliyyə qurumlarının qarşısına bu məsələni belə qoymalıyıq ki, “Sberbank” çirkli pulların yuyulması və terrorçuluğun maliyyələşdirilməsilə məşğuldur”.