Media-icmal 17.07.20

Ölkədə COVİD-19 virusu ilə bağlı vəziyyət, keçmiş nazirdən 12-14 iyul döyüşlərinə baxış, Qarabağ münaqişəsi fonunda Türkiyə-Rusiya münasibətləri və s. məsələlər medianın aparıcı mövzuları sırasındadır...

Virusa yoluxma sürətlə artır - professor

"Redaktor.az" saytı "Azərbaycanda gündə 2500 adam yoluxur və… - həkimdən şok açıqlama" sərlövhəli məqalədə ölkədə koronavirus pandemiyası ilə bağlı vəziyyəti professor Adil Qeybulla ilə dəyərləndirir. 

Onun sözlərinə görə, hazırda COVİD-19-a gündəlik yoluxma sayı 2000-2500-dən yuxarıdır, bütün xəstələr qeydiyyatdan keçmir, evdə müalicə alan, qonşudan resept alan, həkim tapan və s. insanların sayı kifayət qədərdir və elan olunan rəsmi rəqəmlər insanları arxayın salmamalıdır.

"Birinci dəfə karantin qaydaları yumşaldılan zaman (2020-ci ilin may ayındakı yumşaldılmalar nəzərdə tutulur - red.) hər şeyin taleyin ümidinə buraxılması bugünki vəziyyəti yaratdı", deyə professor hazırda virusa yoluxmanın artmasının səbəbini göstərir.

A.Qeybulla hesab edir ki, insanların kütləvi toplanmaları və karantin davranışlarına əməl etməmələri bu infeksiyaya yoluxmanın əsas mənbələrindən biridir. 

Professor iyulun 12-14-də Ermənistan hərbi bölmələrinin Azərbaycana hücum cəhdinə cavab olaraq keçirilmiş döyüşlərlə bağlı iyulun 14-də Bakıda orduya dəstək yürüşündə insanların karantin davranışlarına əməl etməmələrinə xüsusi toxunur: "Qarabağ hamımızın həssas yerimizdir. Hadisələr ektremal şəkildə baş verdi. Amma insanlar başa düşməlidirlər ki, sosial məsafə və maska taxmaq vacibdir. Ən azı bunu etmək lazımdır".

Onun fikrincə, bu qaydalara əməl edilməməsi insanların virusa yoluxma faizinin artması deməkdir.

A.Qeybulla əlavə edir ki, qorxulu məsələ odur ki, karantin ləğv olunarsa, postkarantin davranış qaydalarına daha ciddi riayət edilməlidir, ən qorxulusu isə buna əməl olunmamasıdır. 

Professor hesab edir ki, artıq karantin ləğv olunmalıdır.  "Karantin artıq ləğv edilməlidir. Çünki insanlar depressiyaya, panikaya düşür. Amma postkarantin davranışları izah olunmalıdır. Televiziyalarda mənasız, heç kimə lazım olmayan zərərli verilişlərdənsə, bu istiqamətdə maarifləndirmə aparılmalıdır".

Professora görə, maarifləndirmə tədbirlərinə, ictimai qınaq elementlərinə üstünlük verilməlidir: "Məsələlər cərimələr və digər cəza tədbirləri ilə həllini tapan deyil. Dünya təcrübəsinə əsaslanan tədbirlər həyata keçirilməlidir". 

Əgər havadarı geri dursa...

"Moderator.az" isə "Əgər düşmənin arxasında dayanan havadarı geri durarsa, onu diz çökdürməyə qadir ordumuz var" sərlövhəli məqalədə müəllif keçmiş müdafiə naziri Səfər Əbiyevlə söhbətləşir. Keçmiş müdafiə naziri öncə bu il iyulun 12-14-də Tovuz rayonu istiqamətində baş vermiş hərbi əməliyyatları dəyərləndirir.

Onun fikrincə, Azərbaycanın Tovuz rayonu istiqamətində erməni silahlı bölmələrinin Azərbaycan dövlət sərhədini qəfldən və ağır silahlarla atəşə tutması regionda hərbi-siyasi vəziyyəti kövrək duruma gətirdi.

S.Əbiyev hesab edir ki, üç gün davam edən şiddətli döyüşlərin geniş müharibəyə çevrilmə ehtimalı yüksək idi, amma Azərbaycan ordusu düşməni geri çəkilməyə məcbur etdi: "Növbəti həmlələr olacağı təqdirdə Azərbaycan ordusundan daha ağır zərbələr alacağı qaçılmaz olacaq", deyə keçmiş müdafiə naziri əlavə edir.

S.Əbiyevə görə, Ermənistan tərəfi Azərbaycan SQ-nin şiddətli əks hücum zərbələrini bəlkə də heç ağlına gətirmirdi, amma Azərbaycan əsgəri ona öz yerini göstərdi.

Keçmiş müdafiə naziri deyir ki, Azərbaycan Ordusunda hərbi bilik və döyüş qabliyyəti yüksək səviyyədədir, bu mənada qabaqcıl dünya ordularından geri qalmır.

Bunun ardınca isə keçmiş müdafiə naziri Azərbaycan Silahlı Qüvvələrinin indiyə kimi işğalçını niyə Azərbaycan torpaqlarından qovub çıxara bilməməsi səbəbinə aydınlıq gətirərək deyir: "Sual verilə bilər ki, bəs belə güclü ordu işğalçıya niyə layiq olduğu yeri göstərə bilmir? Əgər düşmənin arxasında dayanan havadarı (çox güman ki, Rusiya nəzərdə tutulur - red.) geri durarsa, qısa müddətdə onu diz çökdürməyə qadir ordumuz vardır. Buna heç kimin şübhəsi olmasın", deyə S.Əbiyev bildirir.

Maraqların toqquşduğu məkan - Qarabağ

"Mətbuat.az" saytında yer alan "Türkiyə və Rusiya bu məsələdə qarşıdurmadan yayına bilməyəcəklər" sərlövhəli məqalədə müəllif Qarabağ münaqişəsi fonunda Türkiyə-Rusiya münasibətlərinin perspektivini politoloq Turan Rzayevlə müzakirə edir.

 Politoloqa görə, bu gün Ermənistan-Azərbaycan Dağlıq Qarabağ münaqişəsi hər an dondurulmuş münaqişə statusundan qlobal qarşıdurma sferasına keçə bilər.

T.Rzayevə görə, Qarabağ münaqişəsi Türkiyə və Rusiya arasında siyasi münaqişə yarada bilər: "Türkiyə və Rusiya bu gün tarixlərində olmadıqları qədər yaxınlaşıb, hərbi, iqtisadi, siyasi sahədə əməkdaşlıq edirlər. Regionun bu iki qüdrətli ölkəsi hər nə qədər ortaq maraq çərçivəsində hərəkət etmiş kimi görünsələr də, real mənzərə fərqlidir".

Politoloq vurğulayır ki, rəsmi Moskva və Ankara Suriya və Liviyada iki sınaqdan keçdi, Ərdoğan və Putin ortaq məxrəcə gələ bildi.

Amma T.Rzayev hesab edir ki, Qarabağ mövzusunda rəsmi Ankara və Moskva nəinki uzlaşmaq, heç yaranacaq potensial siyasi qarşıdurmadan yayına bilməyəcəklər: "Bunu Rusiya da bilir, Türkiyə də, Azərbaycan da bilir. Təəssüf ki, Ermənistan da bilir. Məhz Ermənistan silahlı qüvvələrinin Tovuz istiqamətində hərbi təxribat törətməsinin pərdəarxası məqamlarından biri də budur".

Politoloqa görə, indi Moskva Liviyadakı cəhdlərilə Türkiyənin diqqətini Qarabağ məsələsindən ayırmağa, Liviyada qatmağa çalışır.

Politoloqa görə, rəsmi Qahirə də bu məsələdə Rusiyanın yanında yer alır və Moskva bu yolla Türkiyənin diqqətini yenidən Liviyaya çəkmək, Qarabağ münaqişəsini özü təkbaşına nizamlamaq istəyir.