Media-icmal 18.09.20

"Yenisabah.az" saytı  Azərbaycanın tanınmış müğənnisi Zeynəb Xanlarovanıın Tofiq Yaqublunun həbsdən azad olunması üçün İlham Əliyevə müraciətini diqqətə çatdırır.

Xalq artisti, keçmiş deputat Z. Xanlarova Prezident İlham Əliyevə müraciət edərək, Qarabağ qazisi Tofiq Yaqublunu azad olunmasını xahiş edib.

Z.Xanlarova mədəniyyət adamı olduğunu, siyasətlə məsafə saxladığını bildirir: "... ancaq dövlətimiz, millətimiz üçün çox vacib olan məsələlərdə susmamışam və susmayacağam", deyə mövqeyini ifadə edir.

Tanınmış sənət adamı, dövlət başçısına Tofiq Yaqublu ilə bağlı müracət etdiyini, bu adamı şəxsən tanıdığını vurğulayır.  

 "Əminəm ki, Tofiq dövlətimiz, millətimiz üçün ziyanlı addım atmaz. Bu gün onun uzun müddət həbsdə olmasını haqsızlıq kimi dəyərləndirib Sizdən şəxsən xahiş edirəm ki, onun azadlığa buraxılmasına köməklik edəsiniz".

Müğənni T.Yaqublunu  mərd Azərbaycan kişisi, bala acısı görmüş ata kimi tanıdığını deyir. "Bu gün onun həbsdə olması ilə bağlı aclıq etməsi faciə ilə sonuclana bilər. İnanıram ki, belə mövzularda ilk dəfə olaraq Sizə müraciət etməyimi nəzərə alacaqsınız. Bir daha Sizə can sağlığı və Dövlətimiz, Vətənimiz üçün görəcəyiniz işlərdə uğurlar arzulayıram", deyə Z.Xanlarova bildirir. 

"Yeniavaz.com" saytı isə "Mingəçevirdəki İES-in mühafizəçiləri: Bizə işdən çıxmağımız üçün təzyiqlər ediblər" sərlövhəli məqalədə bu insanların işdən çxmaları üçün edilən təzyiqləri gündəmə gətirir.

Müəllifin sözlərinə görə, Mingəçevirdə yerləşən "Azərbaycan" İstilik Elektrik Stansiyasının (İES) mühafizəsini həyata keçirən işçilər kütləvi şəkildə işdən çıxarılıb.

Müəlif əlavə edir ki, bu barədə məlumat işdən çıxarılan işçilərin sosial şəbəkələrdə yayılan video müraciətində qeyd olunur.

Yayılan müraciətə görə, bu ilin iyun ayında "Azərenerji" ASC Hərbiləşmiş Mühafizə Dəstəsinin işçiləri olan və "Azərbaycan" İES-in mühafizəsini həyata keçirən 12 nəfər işdən azad edilib. Mühafizəçilər iddia edirlər ki, qanunsuz şəkildə işdən çıxarılıblar.

"Müəssisə rəhbəriyi işçilərə işdən çıxmaq barədə ərizə yazmağı təklif edib, əks halda  Əmək Məcəlləsinin "70 Ç" (işçi özünün əmək funksiyasını və ya əmək müqaviləsi üzrə öhdəliklərini yerinə yetirmədikdə, yaxud əmək vəzifələrini kobud şəkildə pozduqda) maddəsinə əsasən işdən çıxarılacağımızı söyləyib".

Məsələ ilə bağlı "Azərenerji" ASC-dən deyilib ki, həmin şəxslər vəzifələrinin icrasında səhlənkarlığa yol veriblər, obyekt isə strateji əhəmiyyətli, taleyüklü xidmət sahəsidir.

"Strateji obyektlərin mühafizəsinin sayıqlığını yoxlamaq, təhlükəsizliyi yüksək səviyyədə təşkil etmək üçün mövcud vəziyyət nəzərə alınaraq şərti əməliyyat keçirilib. Bu əməkdaşlar isə nəinki şərti əməliyyata reaksiya verib, heç bundan xəbərləri olmayıb".

"Mətbuat.az" saytı isə "Əhali internetin keyfiyyətindən razıdırmı?" sərlövhəli məqalədə verilən suala cavab axtarır.

Müəllifin sözlərinə görə, yüksək sürətli internet hər kəs üçün arzu olsa da, bəzən müəyyən ərazilərdə mövcud olmur.

Bəs internet provayderlərinin fəaliyyəti vətəndaş məmnunluğu yaradırmı?

Müəllifin sözlərinə görə, istifadəçilərin ümumi olaraq 74 faizi ölkədə internetin keyfiyyətindən razıdır, 54 faiz istifadəçi isə tez-tez internet kəsintilərindən şikayət edib. İntenet istifadəçilərinin 45 faizi internet sahəsində göstərilən texniki dəstək xidmətinin fəaliyyətindən narazıdır.

İstifadəçilərin 50 faizi isə deyib ki, ümumiyyətlə çağrı mərkəzinin xidmətlərindən yararlana bilmir. Azərbaycanda fəaliyyət göstərən internet provayderlərinin 53 faizi sürətli fəaliyyət göstərir.

Sərfəli, əhalinin cibinə uyğun fəaliyyət göstərənlər isə 13 faizdir.

Aparılmış sorğu nəticəsində məlum olub ki, Azərbaycanda aylıq internet üçün orta statistik ödəniş 16 manatdır.

Qeyd edək ki, ölkədə internet-provayderlər arasında birinci pillədə qərarlaşan "KATV" şirkətidir. Həmçinin "KATV" öz müştərilərinə fiber-optik şəbəkələr üzərindən internet şəbəkəsinə məhdudiyyətsiz 100 Mbit/s sürətli qoşulma xidmətini təqdim edir, "Bir link" internet provayderi "KATV"dən sonra üçüncü ən yaxşı internet provayderi sayılır. Aparılmış statistik araşdırmaya əsasən, çox da məmnun olmasalar da, daha çox istifadə edilən internet provayder şirkəti "Aztelekom"dur.  Araşdırmada iştirak edən sorğu iştirakçılarının 14 faizi "Bakinternetin" internet xidmətlərini tanıdığını bildirib.  Qeyd edək ki, məqalədə istifadə olunan iqtisadi göstəricilər Metbuat.az-ın "ERA" Marketinq Mərkəzindən aldığı məlumatlara əsaslanır.