Media-icmal 21.10.20

“Azərbaycan” qəzeti  “Ermənistanın təcavüzkar mövqeyi Cənubi Qafqaz regionunun gələcəyini təhdid edən əsas təhlükə mənbəyinə çevrilib” sərlövhəli məqalədə Cənubi Qafqazda vəziyyətlə bağlı energetika naziri Pərviz Şahbazovun düşüncələrinə yer verib.  

Nazir deyir ki, indi hərbi əməliyyatların getdiyi bir vaxtda regionun təhlükəsizliyi və onun təmin olunmasında enerji amilinin rolu xüsusilə aktuallıq qazanır.

Nazirə görə, Azərbaycanın apardığı haqq savaşının əsas məqsədlərindən biri də ədalətin bərpası ilə yanaşı, onun səyləri nəticəsində regionda qazanılmış sabitlik və inkişaf mühitinin dayanıqlılığının təmin edilməsi və gələcək üçün təhlükələrin aradan qaldırılmasıdır:

“Ermənistanın təcavüzkar mövqeyi illərdən bəridir ki, Cənubi Qafqaz regionunun gələcəyini təhdid edən əsas təhlükə mənbəyinə çevrilib. Ərazilərimizin işğalı beynəlxalq hüquq normalarının, bir milyon vətəndaşımızın insan hüquq və azadlıqlarının pozulması ilə bərabər, regionun imkanlarından, iqtisadi potensialından tam istifadəni də əngəlləyir, eyni zamanda, əldə edilmiş nailiyyətlər üçün təhdidlər yaradı, - P.Şahbazov bildirir.

Nazir erməni hərbi qüvvələrinin Mingəçevrdəki su və istilik stansiyanı, Tovuz istiqamətində neft-qaz kəmərlərini davamlı hədəfə almasını belə təhdidilərdən hesab edir. 

P.Şahbazov hesab edir ki, “Cənub” qaz dəhlizinin tam istismara veriləcəyi bir tarixdə belə təxribatlar Avropanın diversifikasiya məqsədini də hədəfə almış olur.

“Redaktor.az”   saytı isə “Ordumuz hər şeyi dəyişdi: Artıq "5+2" yoxdur” sərlövhəli məqalədə müəllif ABŞ və Rusiyanın Azərbaycan və Ermənistan tərəfin növbəti görüşünü keçirmək səylərini ekspert Natiq Cəfərli ilə şərh edir.  

Onun deməsinə görə, Rusiya prezident İlham Əliyev və Nikol Paşinyanın danışıqlarını Moskvada, ABŞ isə hər iki ölkənin XİN rəhbərlərinin görüşünü Vaşinqtonda təşkil etmək istəyir. O, Vaşinqton və Moskva görüşündə bir neçə mühim məqamın olduğunu vurğulayıb,

N.Cəfərli deyir ki, Rusiya, “Cənubi Qafqazın açarı məndədir, heç kim bura qarışmasın” mesajını vermək üçün təşəbbüsü əldən vermək istəmir, bunun üçün aktivliyini artıracaq.

Ekspert deyir ki, iki həftə sonra ABŞ-da seçkilərdir, sorğulara görə, Tramp Baydendən 10% geridədir, Ağ Ev də Qarabağ məsələsində aktivlik göstərərək “erməni lobbisinin” səslərini və dəstəyini qazanmağa çalışır.

N.Cəfərli ABŞ görüşünü mənasız hesab edərək əsas hadisələrin Moskva görüşündə cərəyan edəcəyini vurğulayır.

Ekspert hesab edir ki, Moskva görüşünə qədər Azərbaycan hərbi qüvvələri  cəbhədə əldə etdikləri uğurları daha da dərinlşdirilməlidir “...həm Moskva, həm Vaşinqton görüşlərindən öncə müzəffər ordumuz masada olan bütün formulları dəyişməlidir, zatən dəyişib, artıq 5+2 yoxdur. Amma Moskva və Vaşinqton görüşünə qədər bu formul tam masadan qalxmalıdır”, - ekspert bildirir.

“Moderator.az”  saytı “Ermənilər ümid edirdi ki, Rusiya onların əvəzinə vuruşacaq...” sərlövhəli məqalədə müəllif erməni tərəfinin sentyabrın 27-dən davam edən hərbi əməliyyatlarda məğlubiyyətinin səbəblərini açıqlayır.  

F.Sadıqov deyir ki, Ermənistanın bu döyüşlərdə həlledici məğlubiyyətdən yaxasını qurtara biləcəyi kimi düşüncələr əsassızdır.   

O hesab edir ki, erməni tərəfinin bundan əvvəlki gözləntiləri kimi indiki gözləntiləri də özünü doğrultmayacaq. 

Politoloq deyir ki, Ermənistan rəhbərliyi “erməni xalqının 100 il əvvəl soyqırıma məruz məruz qalması” yalanı ilə bağlı hər kəsin onlara yardım etməli olduğunu umurdu. 

Politoloq vurğulayır ki, zaman da, geosiyasi vəziyyət də dəyişib, ermənilərin bütün ömürlərini başqalarının ərazilərini zəbt edərək öz ərazilərini genişləndirməyə həsr etdikləri hamıya məlumdur və onların heç vaxt öz torpaqları olmayıb, digər dövllətlərin torpaqları hesabına yaşayıblar.

Onun deməsinə görə, Dağlıq Qarabağ məsələsində ermənilər ümidli idilər ki, kimlərsə onlara yardım edəcək, kimsə gəlib yanlarında duracaq və Rusiya ilə bağlı belə gözlənti xüsusilə böyük idi. 

“Amma Rusiya açıq şəkildə nümayiş etdirdi ki, ermənilərin yerinə və əvəzinə vuruşmayacaq. Sübut etdi ki, onların ümidləri mənasızdır və belə bir gözlənti üçün əsas yoxdur”, - politoloq bildirir.

F.Sadıqov deyir ki, Azərbaycanla danışıqların hələ bundan sonra da davam edəcəyi düşüncəsində də ermənilər yanıldılar və bu gözləntilər də özünü doğrultmadı.

Politoloq deyir ki, artıq son mərhələdir, Azərbaycan ordusu sözünü deyir, sona kimi torpaqları azad edəcək.