Media-icmal 21.11.20

"Azərbaycan" qəzeti  "Müsbət tendensiyanın yenidən əldə olunması özümüzdən asılıdır" sərlövhəli məqalədə

COVİD-19 pandemiyasına qarşı mübarizəni dəyərləndirir.

Müəllif deyir ki, dünya üzrə 57 milyon nəfərdən çox adam bu virusa yoluxub. Azərbaycanda da son vaxtlar yoluxma artıb, bir neçə şəhər və rayonda sərt tədbirlər həyata keçirilir, ərzaq mağazaları və apteklər istisna olmaqla, digər bütün sahələr üzrə yerində xidmətlər dayandırılıb.

21 noyabrdan etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda tibbi maskalardan istifadə məcburi hesab olunur və maskalardan istifadə qaydalarına nəzarət rejimi daha da sərtləşdirilib.

Xatırladaq ki, tibbi maskadan istifadə olunmaması və ya tələb olunan normalara uyğun taxılmaması qanunla müəyyən edilmiş qaydada məsuliyyət yaradır, yaşı 65-dən yuxarı şəxslərin zərurət yaranmadan yaşayış yerlərini tərk etməmələri tövsiyə olunur.

Həmçinin özəl sektorda və digər sahələrdə fəaliyyət göstərən qurum və təşkilatlara da işçilərin say həddinin 30 faizədək azaldılması və digər əməkdaşların məsafədən iş rejiminə keçirilməsi tövsiyə edilir.

Məqalədə vurğulanıb ki, bu yoluxmalarla bağlı hazırkı vəziyyətdə səhiyyə sistemi daha da yüklənib və tibb mütəxəssisləri vətəndaşları virusdan maksimum qorunmaq üçün səy göstərməyə çağırırlar.

"Redaktor.az" saytında  "Türkiyə ordusu gəlir: Qarabağda hər şey dəyişəcək - zəfər bizimdir!" sərlövhəli məqalədə müəllif Qarabağ bölgəsinə türk əsgərlərinin gələ bilməsini politoloqlarla müzakirə edir.

Onlar hesab edirlər ki, Türkiyənin Qarabağa gəlməsi, Rusiya ilə birlikdə sülhü təmin etməsi region üçün çox mühüm haldır.

Eyni zamanda, Türkiyənin bölgəyə gəlişi ilə regionda bir sıra müsbət dəyişikliklər olacağı düşüncəsindədirlər.

Türkiyəni nüfuzlu, dünyada söz sahibi olan ölkələrdən biri sayan politoloqlar qardaş ölkənin Qarabağa gəlməsini, burada Rusiya ilə sülhə nəzarət etməsini müsbət hal kimi dəyərləndirirlər.

Onların fikrincə, Türkiyənin Qarabağda olması ümumilikdə region üçün önəmli bir məsələdir, əgər əvvəllər regionda təkcə Rusiyanın sözü keçirdisə, artıq Türkiyə də burada söz sahibi olacaq, regionun inkişafında müəyyən addımlar atacaq. 

Politoloqlar Türkiyəni Azərbaycan üçün həm siyasi, həm də hərbi baxımdan çox önəmli bir ölkə adlandırırlar. 

Onlar belə bir cəhəti vurğulayırlar ki, Türkiyənin Azərbayacanla yaxınlığı, rəsmi Ankaranın Dağlıq Qarabağla bağlı mövqeyi Rusiyanın bu münaqişəyə açıq şəkildə müdaxilə etməsinin qarşısını aldı.

Politoloqlara görə, Azərbaycanın hərbi və siyasi gücü kifayət qədər çoxdur, amma, bununla belə, müharibə vəziyyətində güclü dövlətlərin dəstəyi çox önəmlidir, Türkiyə Azərbaycanı açıq dəstəklədi, bu dəstək qələbə qazanmaqda önəmli rol oynadı.

"Azpolitika.info" saytında "Rusiya ikili oyun oynamağa çalışır və istəyır ki…" sərlövhəli məqalədə İkinci Qarabağ Müharibəsində Azərbaycanın qələbəsindən sonra  ABŞ, Fransa və Rusiya, eləcə də Rusiya-Türkiyə münasibətlərindəki vəziyyət qiymətləndirilir.

Məsələ belədir ki, Azərbaycan tərəf hərb meydanında qazandığı qələbədən sonra Dağlıq Qarabağa buna qədər nəzərdə tutulan hər hansı xüsusi status verilməsinin gündəlikdən çıxdığını bəyan edib.

Rusiya prezidenti Vladimir Putin status məsələsini ABŞ və Fransa ilə birgə müzakirə etməyə hazır olduğunu bu günlərdə "Rossiya24" telekanalına müsahibəsində bildirib.

Digər tərəfdən, Türkiyə Rusiya ilə birgə müşahidəçi qrupunda iştirak etmək üçün Cənubi Qafqaza gəlir.

Rusiya Federal Kəşfiyyat Xidmətinin rəhbəri Sergey Narışkin isə Qərbi Azərbaycan və Ermənistan millətçilərini müharibəyə şirnikləndirməkdə, iki xalq arasına nifaq salmaqda ittiham edir.

Müəllif bu ziddiyyətli iki mövqedən irəli gələrək, vəziyyəti politoloqlarla qiymətləndirir.

Politoloqlar isə hesab edirlər ki, burada Rusiya ikili oyun oynamağa cəhd edir. Onların fikrincə, Rusiya status məsələsini ABŞ və Fransa ilə müzakirə etməyə hazır olduğunu deməklə bu iki ölkə vasitəsilə Türkiyənin Cənubi Qafqaz bölgəsində fəallığını azaltmaq məqsədi güdür.   

Politoloqlar hesab edirlər ki, V.Putin Türkiyəyə özünün edə bilmədiyini başqalarının əli ilə həyata keçirməyə çalışır.

S.Narışkin isə açıqlaması ilə ABŞ və Fransaya "Rusiyaya qarşı pis əməllərədn çəkinmək" mesajı verir.