Rusiya Ermənistan-Azərbaycan sərhədinə sərhədçilərini yerləşdirəcək.
Lavrov və Şoyqu Yerevana və Bakıya səfər edəcək

Bakı/21.11.20/Turan: Dağlıq Qarabağda sülh şəraitinin qorunması üçün Ermənistan və Azərbaycan sərhədində Rusiya sərhədçilərinin sayı artırılacaq. Bu barədə Rusiya FTX-nin direktoru Aleksandr Bortnikov noyabrın 20-də Rusiya prezidenti Vladimir Putinlə keçirdiyi müşavirədə bildirib.

"Ermənistan tərəfin xahişi ilə Ermənistan Respublikasında FTX-nin sərhəd idarəsinə 188 hərbi qulluqçudan və zəruri sayda texnikadan ibarət əlavə rezerv ayrılıb", deyə o qeyd edib. Onun sözlərinə görə, Tex (Qoriss rayonu) və Sıqır (İranla sərhəd) yaşayış məntəqələrində  sərhədçilər yerləşdiriləcək. Buna qədər Ermənistanın Ararat rayonu və Naxçıvan sərhədində iki yeni məntəqə (Yerasx və Paruyr Sevak) yerləşdirilib. Azərbaycan məlumatlandırılıb, deyə Bortnikov bildirib. Noyabrın 18-dən 20-nə qədər Ermənistana əlavə rezerv göndərilib. Noyabrın 22-dən onlar sərhəddə xidmətə başlayacaqlar, deyə FTX sədri bildirib.

Rusiyanın müdafiə naziri Sergey Şoyqu Putinə Qarabağda Rusiya sülhməramlı kontngentinin yerlədirilməsinin başa çatması - regiona 1960 nəfər və 552 ədəd texnika göndərilməsi haqqında məruzə edib.

Öz növbəsində, RF XİN başçısı Lavrov Qarabağla bağlı sülh sazişini pozmaq cəhdləri olduğunu, bunun narahatlıq doğurduğunu bəyan edib.

Onun sözlərinə görə, Dağlıq Qarabağda atəşkəs sazişi çərçivəsində regiona göndərilən Rusiya sülhməramlılarının fəaliyyətinə mane olmaq cəhdləri olub. 

"Təəssüf ki, Rusiya, Azərbaycan və Ermənistan prezidentlərinin 9 noyabr tarixli bəyanatının yerinə yetirilməsini ləngitməyə, bu bəyanatın tam baş tutmasına imkan verməməyə yönəlmiş təmayül var, biz onu hiss edirik", deyə Lavrov bildirib.

Regionda vəziyyətin və atəşkəs sazişinin yerinə yetirilməsi məsələlərinin müzakirəsi üçün Şoyqu və Lavrov bu gün Yerevana gedib, onlar baş nazir Nikol Paşinyanla görüşəcəklər. Nazirlər Yerevandan İlham Əliyevlə məsləhətləşmələr aparmaq üçün Bakıya gələcəklər, xəbəri Rusiya KİV-ləri yayıb. -02D-