Media-icmal 23.10.20

İşğaldan azad edilmiş ərazilərdə infrastrukturun qurulması, son vaxtlar koronavirus infeksiyasına yoluxmanın artmasının səbəbləri, Türkiyənin milli  müdafiə naziri Hülusi Akardan Qarabağda hərbi əməliyyatlarla bağlı açıqlama, Qarabağda yaşayacaq ermənilərə muxtariyyət məsələsinə baxış və s. məsələlər bugünkü medianın aparıcı mövzuları sırasındadır. 

“Azərbaycan” qəzeti  “İşğaldan azad edilmiş ərazilərdə infrastrukturun bərpasına start verildi” sərlövhəli məqalədə sentyabrın 27-dən bu yana hərbi əməliyyatlar nəticəsində azad edilmiş ərazilərdə infrstrukturun yenidən qurulmasna başlanmasını dəyərləndirir.

Müəllif deyir ki, Azərbaycan ordusu işğal altında olan şəhər və kəndləri bir-birinin ardnca azad edir, bu azad edilmiş ərazilədə binaların dağıdıldığı, mədəni-tarixi abidələrin, məscidlərin qəbirlərin uçurulduğu görünür. 

Müəllif deyir ki, azad edilmiş kəndlər, şəhərlər dedikdə burada şəhərlik və ya kəndlik qalmayıb, xarabazara döndərilib.

Müəllif deyir ki, artıq infrastrukturun bərpasına başlanılıb, Tərtər rayonunun düşmən tapdağından azad edilmiş Suqovuşan və Talış kəndlərinə gedən avtomobil yolları bərpa edilir, ümumi uzunluğu 29 kilometr olan avtomobil yollarının bərpası üçün hazırlıq işlərinə start verilib.

Bununla yanaşı işğaldan azad edilmis və ediləcək rayonlarda yeni 110 kilovoltluq sistem əhəmiyyətli yarımstansiyaların tikilməsi və quraşdırılması, ikidövrəli yüksək gərginlikli 110 kilovoltluq elektrik xətlərinin çəkilməsi ilə bağlı layihələndirmə işi tamamlanmaqdadır.

Müəllif deyir ki, ilkin olaraq Füzuli, Cəbrayıl, Zəngilan və Qubadlı rayonlarının hər birində 110 kilovoltluq sistem əhəmiyyətli 4 yarımstansiyanın tikilməsi və onların arasında 110 kilovoltluq elektrik verilişi xətlərinin çəkilməsi nəzərdə tutulur, paralel olaraq “Azərişıq” ASC-də 35 kilovoltluq yarımstansiyaların tikilməsi ilə bağlı əlaqəli layihələndirmə işləri aparır.

Müəllifin deməsinə görə, ümumilikdə sözügedən 4 rayondan başqa işğaldan azad ediləcək bütün ərazilərdə bölgələrin elektrik enerji təchizatının qurulması və mövcudların yenilənməsi üçün layihələndirilmə işləri sürətli şəkildə aparılır.

“Redaktor.az”  saytı “Azərbaycanda COVID-19-a yoluxma iki səbəbdən sürətlə artır - həkim infeksionist” sərlövhəli məqalədə müəllif son günlər ölkədə ölkədə koronavirusa yoluxmanın artım dinamikası səbəblərini infeksionist Nazxanım Qasımova ilə müzakirə edir.  

N.Qasımova bildirir ki, əslində yoluxmanın statistikasının irəliləməsi, yaxud aşağı düşməsi ilə bağlı dəqiq fikir söyləmək çətindir.

Onun fikrincə, bu, tamamilə insanların özlərini qorumasından, virusa qarşı nə dərəcə məsuliyyətli yanaşmasından asılıdır.

N.Qasımovanın deməsinə görə, rəqəmlər artarsa, tibbi ehtiyat baxımdan buna hazırlıq var, amma yaxşı olardı ki, insanlar tələb olunan qaydalara əməl etsinlər və artım müşahidə olunmasın.

İnfeksionist yoluxmaların səbəblərindən danışaraq bildirib ki, statistikanın artmasına əsas iki amil səbəb olur: “Payız fəsli olduğu üçün digər infeksiyalar artır, bunun nəticəsində insanların immuniteti aşağı düşür. Digər səbəb isə insanların özünü qorumamasıdır. Yəni, insanlar maskadan düzgün istifadə etmir, əl dezinfeksiyasını unudurlar”.

“Yenisabah.az”  saytı “Ermənistan işğal etdiyi əraziləri tərk edəcək! Bu qədər sadə – Türk nazir” sərlövhəli məqalədə Türkiyənin müdafiə naziri Hülusi Akarın Qarabağda davam edən əməliyatların nəticələri barədə düşüncələrinə yer verib.   

“30 ildə nə iş görülüb? Nə vaxt ki, Ermənistanın artan təcavüzkarlığından sonra azərbaycanlı qardaşlarımız öz torpaqlarını azad etmək üçün əks-həmlə əməliyyatına başladı, 30 ildir susanlar sülhdən, atəşkəsdən və müzakirələrdən danışmağa başladılar”, - H.Akar bidirir.

Müəllifin deməsinə görə, H.Akar bunu Ankaranın Polatlı rayonundakı hərbi təlim mərkəzində keçirilən “Atəş sərbəst-2020” hərbi təlimlərində jurnalistlərə açıqlamasında deyib. “Bu, heç səmimi deyil. Məsələnin çox sadə yolu var: Ermənistan işğal etdiyi Azərbaycan torpaqlarını tərk etməlidir! Ermənistan muzdlu əsgərləri, terrorçuları bölgədən göndərəcək və məsələni bitirəcək. Bu qədər sadə”, - nazir vurğulayıb.

O, Türkiyə Azərbaycanın haqlı mübarizəsini sonuna qədər dəstəkləyəcəyini bildirib: “Türkiyə Cümhuriyyəti və türk milləti olaraq azərbaycanlı qardaşların yanında olduğumuzu ifadə etdik”, - nazir vurğulayıb.

“Azpolitika.info”  saytı isə “Heç bir muxtariyyətdən söhbət belə gedə bilməz” – “Nə qədər imkan varsa, irəli getməliyik" sərlövhəli məqalədə müəllif hazırda Qarabağda davam edən əməliyyatların mümkün  nəticələri barədə “Ayna=Zerkalo” qəzetinin redaktoru Elçin Şıxlı ilə söhbətləşir.

E.Şıxlı hazırda Qarabağda baş verən proseslərə görə Rusiyan təqsirli bilərək bu ölkəni  “burnunu hər yerə soxmaqda, aləmi bir-birinə  qatmaqda ittiham edir.

“Düşünürəm ki, imkanımız olduqca irəi getməliyik. Danışıqlar masasına mümkün qədər gec oturmalıyıq. Ermənilərin xislətini, Minsk Qrupunun 30 illik  fəaliyyətini nəzərə alsaq deyə bilərik ki, hərbi uğurların qarşısını almaq üçün istəyəcəklər. Ona görə, nə qədər imkan varsa irəli getməliyik”, - o bildirir.

O deyir ki, artıq status-kvo yoxdur, ATƏT-in Minsk Qrupunun nizamlanma  prinsipləri Azərbaycan ordusunun qələbələrindən heç nəyə yaramır.

E.Şıxlı hesab edir ki, Azərbaycan ərazisində muxtariyyət verilməsini məqbul saymır. “Yaşamaq istəyirlərsə, yaşasınlar, amma heç bir muxtariyyətdən söhbət belə gedə bilməz. Onlara imkan verilsə ən azı beş ildən sonra yenidən baş qaldıracaqlar”.

E.Şıxlı deyir ki, Rusiya Cənubi Qafqazda varlığını saxlamaq üçün Ermənistanı əldən verməyəcək, çünki artıq Gürcüstanı itirib, Azərbaycan müstəqil siyasət yürüdür.

Onun fikrincə, texnoloji inkişaf baxımından geri qalan, idarəolunmaz hala gələn Rusiya bununla belə “burnunu hər yerə soxur”.