Media-icmal 26.04.21

ABŞ-ın 1915-ci il hadisələrini “erməni soyqırımı” kimi tanımasının mümkün  nəticələri, Rusiya sülhməramlılarının fəaliyyətindən artan narazılıq, Bakıda

bağ evlərinin qiymətlərinin bahalaşması, icra məmurlarının məhkəmə qərarı olmadan ailəni yaşadığı evdən çıxarması və s. medianın aparıcı mövzuları sırasındadır... 

“Modern.az” saytı “Bu qərardan ən çox ziyan çəkən məhz Amerika olacaq – deputat” sərlövhəli məqalədə ABŞ prezidenti Co Baydenin 1915-ci il hadisələrini “erməni soyqırımı” adlandırmasını deputat Ceyhun Məmmədovla dəyərləndirir.  

Deputat bu mövqeyə təəssüf edərək, bundan ən çox elə Amerikanın ziyan çəkəcəyini bildirir. Onun fikrincə, ABŞ bu addımı ilə Şərqdə Türkiyə kimi strateji tərəfdaşla münasibətlərə xələl gətirmiş oldu.

Deputata görə, ABŞ-ın belə addım atmasının səbəblərindən biri də Türkiyənin bölgədə durmadan artan nüfuzunun Qərbdə bir sıra dairələri narahat etməsidir: “Ancaq bu, Türkiyənin artan nüfuzunun qarşısını ala bilməz. Türkiyə sürətlə inkişaf edir və bölgədə nüfuzu durmadan artır. Amerika bölgədə sülhü və əməkdaşlığı dəstəkləmək əvəzinə, Ermənistanın cinayət əməllərini dəstəkləməyi üstün tutdu”, deyə ABŞ-ın yanlış addım atdığını iddia edir.

Deputata görə, indiki mərhələdə qarşıda duran mühüm vəzifələrdən biri də strateji tərəfdaşlarla, eləcə də Türk Şurasına üzv ölkələrlə əlaqələrin və birliyin gücləndirilməsidir.

“Müsavat.com” saytı isə “Rəsmi Bakı Kremldən hesabat tələb edə bilər: Rus sülhməramlılar hansı missiyanı icra edirlər?” sərlövhəli məqalədə Rusiyanın Qarabağda sülhməramlı qüvvələrinin fəaliyyətini dəyərləndirir.

Müəllifə görə, Rusiya sülhməramlı qüvvələri 10 noyabr  2020-ci il və 11 yanvar 2021-ci il anlaşmalarını kobud şəkildə pozurlar. Həm də müəllif hesab edir ki, rus hərbi kontingenti bu davranışı ilə bölgə sakinlərinin Azərbaycan cəmiyyətinə inteqrasiyasını əngəlləyir.

Müəllif deyir ki, sülhməramlıların fəaliyyətindən narazılıq ciddi şəkildə artır, bu qüvvələrin öz missiyalarına sadiq qalmaması əsas müzakirə mövzusudur. Müəllif deyir ki, Rusiya müharibənin dayandırılmasında mühün rol oynadığını daim gözə soxur, bunu müstəsna olaraq öz uğuru kimi qələmə verir.

Məqalədə vurğulanır ki, Rusiya problemin həllində yekun nöqtənin qoyulması qarşısında əsas əngəldir, ermənilərə separatizmi davam etdirmək üçün hər cür şərait yaradır. Darmadağın edilmiş Ermənistan ordusunun tör-töküntüləri hələ də Qarabağda qalmaqdadır, halbuki, həmin ərazilərə yalnız dinc erməni sakinlərin qayıdışı nəzərdə tutulmuşdu.

Odur ki, elə Rusiya sülhməramlı qüvvələrinin davranışlarına diqqət edilsə 10-larla kobud pozuntu aşkar etmək olar, yəni, onlar olan bölgədə erməni silahlı terrorçuları hələ də tərksilah olunmayıb, erməni terrorçularına Laçın dəhlizi ilə Ermənistan ərazisindən silah-sursat və ərzaq daşınır, ermənilərə bölgədə yenidən güclənmək imkanı yaradılır.

Laçın dəhlizinə qüsurlu nəzarət ilə Azərbaycana Ermənistan rəsmilərinin və xarici ölkə təmsilçilərinin keçməsinə imkan verilir, Azərbaycan sərhədlərinin kobud şəkildə pozulmasına və əraziyə qanunsuz müdaxiləyə şərait yaratmış olurlar.

Müəllifə görə, çox yaxın vaxtlarda Azərbaycanın Kremldən Rusiya sülhməramlı qüvvələrinin bölgədə nə etmək istədikləri, əslində, hansı missiyanı yerinə yetirdikləri barədə hesabat tələb edə biləcəyi də qətiyyən istisna deyil.

“Redaktor.az” saytı isə “Bağ evlərinin aylıq kirayəsi bahalaşıb” sərlövhəli məqalədə Bakıda bağ evlərinin qiymətlərinin bahalanmasını rieltor Həşim Qədirovla müzakirə edir.

Qədirovun sözlərinə görə, havaların istinləməsilə paytaxtda dənizə yaxın yerlərdə bağ evlərinin kirayəsinə tələb artıb, nəticədə bağ evlərinin aylıq kirayəsi bahalaşıb. O deyir ki, qiymətlər çox baha olduğu üçün bir neçə ailə birləşərək 1 bağ evində kirayə qalmağa üstünlük verirlər.

Əmlak eksperti Nofəl Quliyev isə bildirib ki, Bakıda aylıq kirayə qiyməti 15 min manata olan bağ evləri var, bu evlər Mərdəkan, Şüvəlan kimi ərazilərdə dənizə ən yaxın məsafədə yerləşir: “Bağ evlərinin satış qiymətləri isə 20 faizə qədər bahalaşıb. Bağ evlərinin kirayə və satışına tələbin artması bina evlərinə hələlik marağı azaldıb və kirayə qiymətləri ciddi enib”, deyə Quliyev bildirir.

Rieltorun sözlərinə görə, bağ evlərinə tələb sentyabr ayına qədər davam edəcək, bundan sonra isə bina evlərinə tələbin artacağı və qiymətin bahalaşacağı gözlənilir.

“Yeniavaz.com” saytı isə “Zaqatalada icra məmuru ikiuşaqlı ananı qanunsuz olaraq evdən çıxarıb - iddia” sərlövhəli məqalədə baş verən qanunsuzluğu vəkil Əhməd Nəbiyevlə şərh edir.

Vəkilin sözlərinə görə, Zaqatala icra məmurları iki uşaq sahibi olan ananı evdən məhkəmə qərarı olmadan çıxarıb küçəyə atıblar. Vəkil bununla bağlı video-görüntüləri sosial şəbəkələrdə paylaşaraq bunları yazıb: “Zaqatala şəhərində bu gün (red. 22 aprel) icra məmuru Elvin Əhmədov, məhkəmə qərarı olmadan, 2 azyaşlı uşağı olan Gülxar Zamanovanı evindən çıxarıb küçəyə atdı, evin əşyalarını isə özü ilə apardı. Zaqatalada icra məmuru istədiyini edir, xahiş edirəm tədbir görün. İkiuşaqlı qadın küçədə qalıb, icra məmuru məhkəmə sədrinə qulaq asmır”.

Vəkilin dediyinə görə, Ədliyyə Nazirliyinə müraciət etsələr də cavab verən yoxdur, icra məmurları Zaqatalada istədiyi qanunsuzluğu edirlər.