TƏBİB: “Zığ” Modul Tipli Hospitalı Fövqəladə Hallar Nazirliyinin nəzdində fəaliyyət göstərir

Bakı/26.04.21/Turan: “Bəzi kütləvi informasiya vasitələrində yer alan məlumata görə, Fövqəladə Hallar Nazirliyinin “Zığ” Modul Tipli Hospitalının həbs olunan baş həkimi İmran Ağayev və digər əməkdaşları Tibbi Ərazi Bölmələrini İdarəetmə Birliyi (TƏBİB) ilə müqavilə əsasında işləyiblər. Birmənalı şəkildə bildiririk ki, bu məlumat həqiqəti əks etdirmir. Tibbi Ərazi Bölmələrini İdarəetmə Birliyi  ilə Fövqəladə Hallar Nazirliyi və ya onun xəstəxanası arasında hər hansı müqavilə bağlanmayıb. Hospital Fövqəladə Hallar Nazirliyinin Tibb Xidməti nəzdində fəaliyyət göstərir və Tibbi Ərazi Bölmələrini İdarəetmə Birliyi  tərəfindən həmin hospitalın baş həkim və əməkdaşlarının fəaliyyətinə bu və ya digər formada müdaxilə və ya nəzarətdən söhbət gedə bilməz”. Bu barədə Tibbi Ərazi Bölmələrini İdarəetmə Birliyinin məlumatında deyilir.  

Məlumata görə, Tibbi Ərazi Bölmələrini İdarəetmə Birliyi dəfələrlə ictimaiyyətə hər hansı neqativ hallarla rastlaşdıqda hüquq-mühafizə orqanlarına məlumat vermələri barədə müraciət edib.

“Bundan başqa, fəaliyyətində nöqsanlara yol verən tibb işçilərinin ifşası istiqamətində tərəfimizdən də indiyədək müəyyən tədbirlər görülüb. Nöqsanlara yol verən, qanunsuz əməllərlə məşğul olanlar tutduğu vəzifədən uzaqlaşdırılıb, bir çox tibb müəssisəsinin rəhbəri dəyişdirilib. Bundan sonra da Tibbi Ərazi Bölmələrini İdarəetmə Birliyi tərəfindən bu istiqamətdə ciddi mübarizə aparılacaq, kimliyindən asılı olmayaraq, neqativ hallara yol verən şəxslərə qarşı hüquq-mühafizə orqanları ilə birlikdə müvafiq tədbirlər görüləcək”, deyə qurum bildirir.

Xatırladaq ki, aprelin 24-də fövqəladə hallar naziri Kəmaləddin Heydərov rəhbərlik etdiyi qurumun Tibb Mərkəzinin Modul Tipli Hospitalının baş həkimi İmran Ağayevin həbsinə münasibət bildirərkən yerli mediaya deyib ki, həbs edilən baş həkim Fövqəladə Hallar Nazirliynin əməkdaşı deyil.

“O, bizim işçimiz deyil. Həbs edilən Baş həkim və əməkdaşları Tibbi Ərazi Bölmələrini İdarəetmə Birliyi ilə müqavilə əsasında işləyib. Bizdə pul nə gəzir ki, onları maliyyələşdirək? Həmin Modul Tipli Hospitalı dövlət maliyyələşdirir”, deyə o qeyd edib.

Baş Prokurorluğun məlumatına görə, Bakının Zığ qəsəbəsində yerləşən Fövqəladə Hallar Nazirliyinin Modul Tipli Xəstəxanasının baş həkimi İmran Ağayev aprelin 22-də saxlanılıb.

Bildirilir ki, koronavirus xəstələrinin həmin tibb müəssisəsində yerləşdirilməsi, eləcə də, müalicə alan xəstələrin daha yüksək səviyyəli tibbi və sair təminatla təchiz edilmələri əvəzində müxtəlif məbləğlərdə pul vəsaitinin rüşvət qismində yığılaraq sonradan bölünməsinə əsaslı şübhələr yaranıb.

İmran Ağayev Cinayət Məcəlləsinin 311.3.1-ci (qabaqcadan əlbir olan bir qrup şəxs tərəfindən rüşvət alma) və digər maddələri ilə ittiham elan edilməklə, barəsində məhkəmənin qərarı ilə həbs-qətimkan tədbiri seçilib. -03-