Media-icmal 28.10.20

"Azərbaycan" qəzeti  "Karantin qaydalarına əməl etmək vətəndaşlıq borcudur" sərlövhəli məqalədə ölkə vətəndaşlarının koronavirus infeksiyasına yoluxmaqdan özlərini qorumaları zərurətini diqqətə çatdırır. 

Müəllif deyir ki, bu virusla mübarizə aktual olaraq qalmaqda davam edir, onun qarşısını tam almaq, hələ ki, mümkün deyil, artıq dünya üzrə 45 milyon insan bu virusa yoluxub, son 5 gündə hər gün 400 min insan bu virusa yoluxur.

Müəllif vurğulayır ki, sosial məsafə gözləmək, maska taxmaq, gigiyena qaydalarına əməl etmək effektiv mübarizə üsulu kimi qalmaqda davam edir.

Müəllif deyir ki, son həftələr Azərbaycanda da yoluxma sayı artır, buna səbəb isə karantin qaydalarına riayət edilməməsidir.

Yazı müəllifi bunu da qeyd edir ki, bir aydır başlamış müharibə pandemiyanı sanki unutduraraq arxa plana keçirib, bu isə təhlükəlidir..  

Müəllifə görə, bu virusa qarşı hələ ki, peyvənd məsələsi həllini tapmayıb, odur ki, vətəndaşlar qabaqlayıcı tədbirlər vasitəsilə özlərini qorumalıdırlar.

Məqalədə vurğulanır ki, soyuqların düşməsilə tənəffüs yollarının xəstələnməsi halları artır, odur ki, maska taxılması, əl gigiyenasına diqqət və sosial məsafəyə riayət etmək zərurətə çevrilir.

"Redaktor.az" saytı  "Trampın nəticəsiz humanitar atəşkəsi seçki şousu…" sərlövhəli məqalədə  Ermənistanın atəşkəsi pozmasını deputat Elşad Mirbəşiroğlu ilə dəyərləndirir.

Deputata görə, Ermənistan hər dəfə atəşkəs rejimini pozmaqla diqqəti münaqişənin sülh yolu ilə həllinin olmamasına cəlb etmək istəyib. 

"Vaşinqtonda üçüncü dəfə humanitar atəşkəs rejimi ilə bağlı razılıq əldə olundu. Nəticə nə oldu? Yenə də Ermənistan tərəfi kobud şəkildə humanitar atəşkəs rejimini pozdu", deyə deputat diqqəti bu fakta yönəldir.

E.Mirbəşiroğlu yada salır ki, buna qədər iki dəfə Moskvada atəşkəs razılığı yarandı, yenə də ermənilər əldə edilmiş razılığı pozdular. Deputata görə, bu fakt həm də işğalçı rejimlə sülh dili ilə danışmağın mümkün olmamasının göstəricisidir.

Parlament üzvünə görə, Azərbaycan ortaya qoyduğu mövqedə haqlıdır, bu baxımdan Vaşinqton görüşü formal xarakter daşıyır: "Əslində Vaşinqton görüşü sadəcə formal olaraq təşkil olunmuşdu. Tramp ABŞ-dakı ermənilərin səsini qazanmaq üçün belə bir görüşün keçirilməsinə vasitəçi oldu. Açıq desək, o, bununla ermənilərə özünü yaxşı formada təqdim etmək istəyirdi".

E.Mirbəşiroğlu hesab edir ki, ermənilərin özü bu görüşü səmərəsiz və nəticəsiz etdi, amma Azərbaycan münaqişənin sülh yolu ilə həllində maraqlıdır.

"Bizimyol.info" saytı isə "Hərbi ekspert: Ermənilərin müharibənin gedişatında dönüş yaratması mümkün deyil" sərlövhəli məqalədə müəllif hərbi ekspert Tərlan Eyvazovla mövcud hərbi vəziyyəti dəyərləndirir.

Daha doğrusu, T.Eyvazov hazırda hərb meydanında məğlub durumda olan Ermənistanın vəziyyəti dəyişib-dəyişməyəcəyinə aydınlıq gətirir.

Müəllif deyir ki, Prezident İlham Əliyev Ermənistanda Rusiyanın neçə MiQ-29, Su-30 təyyarələri, Gümrüdəki bazada Rusiyanın 5 minlik qoşunu var: "... və bizdə olan məlumata görə, oradan vaxtaşırı olaraq Ermənistan silahlı qüvvələrinə təchizat göndərilir və bizim barəmizdə deyilənlərdən fərqli olaraq, bunlar faktdır".

Müəllif deyir ki, elə bu fakt özü "müharibənin gedişində dönüş yarada bilərmi?" sualını meydana gətirir, amma T.Eyvazov deyir ki, Rusiya Ermənistanın bütün ehtiyacını ödəyə bilməz.

Onun sözlərinə görə, Ermənistanda olan Rusiya bazası Azərbaycan Ordusunun vurduğu ziyanı aradan qaldırmaq gücündə deyil. "Bu baza yalnız onların hal-hazırda mühasirədən çıxmasına, müəyyən qədər dözüm gətirməsinə səbəb ola bilər. Həmin qoşun birləşməsinin özünü belə Azərbaycana qarı yönəltsələr, yenə də müharibənin gedişatında dönüş yaratmaq mümkün deyil".

"Modern.az" saytında "Azad olunmuş torpaqlara işıq, qaz, yol çəkilir - rəsmi qurumlardan açıqlama" sərlövhəli məqalədə işğaldan azad edilmiş ərazilərdə infrastruktur qurulmasından danışılır.

Müəllif deyir ki, sentyabrın 27-dən başlanan 2-ci Qarabağ savaşındakı əks-hücum əməliyyatı nəticəsində işğaldan azad olunmuş ərazilərdə yenidənqurma işlərinə başlanılıb.

Azərbaycan Avtomobil Yolları Dövlət Agentliyi tərəfindən azad olunmuş ərazilərin avtomobil yollarının bərpası işləri aparılır.

Müəllif yada salır ki, ümumilikdə işğal altında olan ərazilərdə 2661 km avtomobil yolu var idi. Hacıqabul-Bəhrəmtəpə-Mincivan 286 km-lik magistral yolunun düşmən tapdağında olan 110 km-lik hissəsi artıq tam azad edilib.

 "Azəriqaz" bildirir ki, işğaldan azad olunmuş ərazilər üçün qaz çəkilişinin lahiyəsi hazırlanır.

 "Azərişıq" isə bəyan edir ki, mülki obyektlərin hədəfə alınması nəticəsində baş verən qəzaların aradan qaldırılması və azad olunmuş torpaqlarda güc mərkəzlərinin yaradılması üçün işlər gedir, qəzaların aradan qaldırılması və bərpası işləri operativ şəkildə həyata keçirilir.

"Azpolitika.info.az" saytı isə "İran Azərbaycan sərhədinə qoşun yerləşdirir - Xudafərin və Culfa sərhəd məntəqələri gücləndirilir" sərlövhəli məqalədə) bu addımın səbəblərini izah edir.

Müəllif İran mənbələrinə istinadən deyir ki, İran İslam İnqilabı Keşikçiləri Korpusunun mexaniki briqadası Azərbaycan-Ermənistan sərhədinin Xudafərin və Culfa məntəqələrinə yerləşdirilib.

Müəllifə görə, İran tərəf bunu ölkənin ərazi bütövlüyünü, Xudafərin vilayəti sakinlərini qorumaq məqsədilə etdiyini bildirib. 

Bununla bağlı İran tərəf bəyan edib ki, bölgədəki addımları ilə vəziyyəti ciddi izlədiklərini, sərhədlərin toxunulmazlığına hörmət etdiklərini, bölgə ölkələrinə sərhədlərin geosiyasətində dəyişikliklər qəbul etməyəcəklərini göstərirlər.