Media-icmal 29.04.21

“Yeniavaz.com”  saytı “Sakinlər Saatlı İcra Hakimiyyətinin qarşısına etiraza toplaşıb” sərlövhəli məqalədə aprelin 28-də keçirilmiş aksiyanın səbəbləri şərh edilir.

Müəllifin deməsinə görə, aksiyanın keçirilməsinə səbəb kimi bəzi kəndlərdə 3 aya yaxındır suyun olmaması, pay torpaqlarının mənimsənilməsi, əlillik təyinatlarının ləğv edilməsi və sair göstərilir.

Müəllif deyir ki, bu sadalanan problemlərə görə icra başçısı və müavini heç kimi qəbul etmir. Amma məqalədə vurğulanır ki, icra başçısı etiraz edən bir qrup sakinlə görüşüb, səlahiyyətlərinə daxil olan məsələləri həll edəcəklərinə vəd  verib. Müəllif əlavə edir ki, sadəcə, pandemiyaya görə vətəndaşların qəbulu  məhdudlaşdırılıb, qəbullar onlayn formada keçirilir.

İcra Hakimiyyətinin əməkdaşlarından biri isə aksiya keçirən sakinləri ajiotaj yaratmaqda ittiham edib.

Su məsələsi ilə bağlı bildirilib ki, rayona su daxil olduqda daşıyıcı kanallar vasitəsilə kəndlərə daşınır və hazırda susuzluqla bağlı problem yoxdur. İcra Hakimiyyətindən deyilib ki,  elələri var ki, uzun illər əvvəl dövlətin verdiyi pay torpağını satıb. İndi isə həmin torpaqların qaytarılmasını istəyir: “Torpaq xüsusi mülkiyyətdir, ona biz nə edə bilərik ki? Əgər alqı-satqıda problem yaranıbsa məhkəməyə müraciət etmək lazımdır" deyə çıxış yolu göstərilib.

“Yenisabah.az”  saytı isə “Böyük siyasətdə dostluğa yer yoxdur - Putinə bağlanan ümidlər özünü doğrultmur” sərlövhəli məqalədə hazırda Ermənistanda baş verən prosesləri şərh edən politoloq Əlimusa İbrahimov bildirib.

İbrahimov Ermənistanda keçirilməsi gözlənilən erkən parlament seçkilərində indiki baş nazir Paşinyanın və ona müxalif qüvvələrin iştirakını şərh edir, Politoloqa görə, indiki halda belə müxalif qüvvələr bu seçkilərdə qalib gələ biləcəklərini şübhə ilə qarşılayırlar.

Keçmiş prezident Köçəryanın seçkilərdə iştirakına gəlincə, politoloq deyir ki, bu şəxsin, sadəcə, başqa yolu yoxdur, onu seçkiyə dəvət etmirlər. Onun gələcək karyerası, azadlıqda qalması belə seçkidə kimin qalib gəlməsindən asılıdır. 

Politoloqun deməsinə görə, Köçəryanın Putinlə dostluğu belə onun xilas yolu deyil və özünü doğrultmur: “Putinə görə, böyük siyasətdə dostluğa yer yoxdur. Odur ki, Köçəryan istər-istəməz bu seçkiyə qoşulur”, -politoloq bildirir.

“Modern.az” saytı isə Ermənistan “əsir kampaniyası”nı gücləndirib - Qərbin Azərbaycana təzyiqi artır” sərlövhəli məqalədə Azərbaycana təzyiqlərin səbəbləri şərh edilir.

Politoloqlar 2020-ci il noyabrın 10-dan sonra Azərbaycanın ələ keçirdiyi erməni yaraqlılarını haqlı olaraq hərbi əsir adlandırmamasına diqqət çəkirlər. Onlar hesab edirlər ki, erməni tərəf bu adamları təxribata göndərib, Azərbaycan hərbçilərinə atəş açıblar və bu şəxslər terrorçulardır.

Politoloqlar  məsələni buna fokslandırıblar ki, Ermənistan hakimiyyəti xaricdəki havadarları vasitəsilə aylardır Azərbaycana qarşı “əsir kampaniyası” təşkil edib və açıq etiraf etmək lazımdır ki, Qərbin müxtəlif mərkəzlərində dəstək görürlər.

Onun sözlərinə görə, ermənilər “əsir” mövzusundan Azərbaycana qarşı siyasi təzyiq aləti kimi istifadə edirlər: “Fransa və ABŞ-dakı ermənipərəst dairələrin “əsir” mövzusunu qanunverici orqanlara çıxarması da istisna deyil.

Politoloqlar hesab edirlər ki, digər tərəfdən təzyiq qarşısında hücum diplomatiyası gücləndirilməlidir, Azərbaycan ombudsmanının da fəallığını artırmasına ehtiyac var.

“Azvision.az”  saytı isə “Parkovşik”lərin arxasında himayədarlar var” sərlövhəli məqalədə avtomobillərin dayanma-durma məsələsi şərh edilir. 

Müəllifin deməsinə görə, Bakı Nəqliyyat Agentliyi and-aman edir ki, “parkovşik” adlanan şəxslərin yaxından-uzaqdan aidiyyatı yoxdur: “Bu gün Bakı şəhərində kim 1 manatı elə-belə yığa bilər? Onların arxasında müəyyən himayədarlar var” Bakı Nəqliyyat Agentliyindən bildiriblər.

Müəllifin deməsinə görə, Bakı Nəqliyyat Agentliyi İdarə Heyətinin sədri Vüsal Kərimli də belə uyğun açıqlama ilə çıxış edib.

Vüsal Kərimlinin deməsinə görə, həmin park yerlərində vətəndaşın daşınan əmlakına ziyan vurulsa da, dəymiş zərər qarşılanmır.

“Bakı şəhərində tariflər tətbiq olmadan vəsaitlərin yığılmasından söz gedə bilməz. Hər hansı parklanmada duran kəsə Bakı Nəqliyyat Agentliyi  tərəfindən vəsiqə verilməyib. Mənə də yaxınlaşıblar, məsələ araşdırılıb və sonu polisdə bitib”, - Vüsal Kərimli bildirib.

O qeyd edib ki, parklanma məsələsi qaldırılanda fərqli kanallar, istiqamətlərdən qara piar aparırlar: "Məqsədimiz Bakı şəhərində yeraltı və yerüstü qarajlara investisiyaların cəlb edilməsi idi. Gəliri və tarifi hesablanmadan investisiyanı cəlb edə bilmirik”, - Vüsal Kərimli bildirir.

O əlavə edib ki, parklanma ilə bağlı ilkin pilot layihə 6-cı paralel küçəsində tətbiq ediləcək. Həmin ərazidə fərqli parklanma siyasəti tətbiq ediləcək. Bundan sonra Bakı şəhərinin mərkəzini və ətraf ərazilərini əhatə edəcək və "parkovşik" məsələsi qalmayacaq.

Vüsal Kərimli vurğulayıb ki, “parkovşik məsələsi Bakı Nəqliyyat Agentliyinin fəaliyyəti dövründə yaranmayıb, əvvəlki dövrdən bu quruma “miras qalıb”.