Media-icmal 30.09.20

"Azərbaycan" qəzeti "Haqq savaşı" sərlövhəli məqalədə Azərbaycan Ordusunun Qarabağda işğalda olan torpaqların azad edilməsi uğrunda apardığı döyüş əməliyyatlarının ilkin nticələrini dəyərləndirir.

Müəllif vurğulayır ki, 2020-ci il sentyabrın 27-dən etibarən Azərbaycan Ordusu növbəti tarixi zəfərlərə imza atır, Ermənistanın hərbi təxribatının, mülki əhaliyə qarşı yönəlmiş təcavüzkar hücumunun qarşısını alaraq bütün cəbhə boyu əks-əməliyyatlara davam edir.

Müəllif əlavə edir ki, artıq Azərbaycanda hərbi vəziyyət və qismən səfərbərlik elan edilib.

Yazıda vurğulanır ki, erməni tərəfdən fərqli olaraq, Azərbaycan Ordusu mülki obyektləri hədəfə almır. Bu faktlar onu göstərir ki, Azərbaycan Ordusu təkcə hərbi qüdrəti ilə deyil, mənəvi keyfiyyətləri ilə də qarşı tərəfdən fərqlənir.

"Hər bir azərbaycanlı üçün vətən Qarabağdan başlayır. Bu müharibə bizim üçün Vətən müharibəsidir. Qarabağın işğalının üzərindən xeyli zaman keçsə də, ürəyimizdəki nisgili heç zaman qaysaq bağlamayıb. Elə buna görədir ki, Ali Baş Komandanın bir Qarabağ nidasına milyonlarla hay verildi. Artıq qələbə zamanıdır, haqqın, ədalətin öz yerini tapacağı andır", deyə müəllif bildirir.

"Müsavat.com" saytı "Ermənilərin öldürdüyü mülki şəxslərin sayı 12-yə çatdı" sərlövhəli məqalədə Ermənistan Ordusunun mülki əhaliyə qarşı silah işlətdiyini diqqətə çatdırır.

"Ermənistanın hərbi-siyasi rəhbərliyinin göstərişi ilə düşmənin silahlı qüvvələrinin dinc Azərbaycan əhalisinin sıx yaşadığı əraziləri növbəti dəfə ağır artilleriyadan atəşə tutması nəticəsində hazırkı vaxtadək ümumilikdə mülki əhalidən 35 nəfər müxtəlif dərəcəli bədən xəsarətləri alaraq xəstəxanalara yerləşdirilib, 12 nəfər şəxs isə həlak olub", deyə Azərbaycan Baş Prokurorluğunun yaydığı məlumatda vurğulanır.

Baş Prokurorluq bildirir ki, erməni tərəfin mülki obyektləri atəşə tutması nəticəsində 66 yaşayış evi, 8 mülki obyekt yararsız vəziyyətə düşüb, çoxsaylı xırda və iribuynuzlu heyvanlar tələf olub.

"Redaktor.az" saytı isə "Bizi heç bir ölkənin çağırışı dayandıra bilməz" sərlövhəli məqalədə işğalda olan torpaqların azad olunmasının geridönməz xarakter aldığını xüsusi vurğulayır.

Müəllif deyir ki, Azərbaycan dövləti torpaqları tam azad etməkdə qərarlıdır, hazırda plan üzrə döyüşlər gedir və qarşıya qoyulan tapşırıqlar sıra ilə yerinə yetirilir: "Ordumuz verilən əmrin aliliyini saxlayaraq, itkilərin az olmasına çalışır. Buna görə də bəzilərinə elə gəlir ki, irəliləmə çox yavaş gedir. Ancaq bizim indiki üsulumuz düşmənə maksimum zərbə endirmək, onu zəiflətmək və ondan sonra irəliləməkdir. Bu taktika itikilərimizi minumuma endirir". Bunu polkovnik Şair Ramaldanov bildirib.

Müəllifin sözlərinə görə, erməni tərəfin itkiləri qat-qat çoxdur, bu da Azərbaycan Ordusunun məqsədli və hazırlıqlı döyüş taktikasının nəticəsidir.

Polkovnik bir neçə ölkənin atəşkəs çağırışlarına da münasibət bildirib və deyib ki, Azərbaycan Ordusu heç bir halda geri çəkilməyəcək, ordumuzun planı ancaq irəli getməkdir: "Bütün çağırışların, şərtlərin qarşısına biz bir şərt qoyuruq – Azərbaycanın ərazi bütövlüyü tam bərpa olunsun! Yerdə qalan heç bir şərti qəbul etmirik".