Media-icmal 31.01.20

Azərbaycanın İnternet resursları ölkə gündəmini dəyərləndirirlər. Bu dəyərləndirmədə nələr diqqət mərkəzindədir. Ölkə gündəmini əsasən nələr zəbt edib. Hələlik növbədənkənar parlament seçkiləri və bu çərçivədə baş verənlər, ölkə iqtisadiyyatının inkişafı, Qarabağ problemilə bağlı aparılan danışıqlar, koronavirusun getdikcə yayılması media panoramasında aparıcı yer tutur.    

“Moderator.az” saytında dərc edilən “Söhbət Qarabağın Azərbaycana qaytarılmasından yox,  Rusiyanın, ya ABŞ-ın təsirində qalmasından gedir...”  sərlövhəli məqalədə yanvarın 30-da Cenevrə şəhərində başa çatmış Azərbaycan-Ermənistan danışıqları dəyərləndirilir.   

Müəllif hesab edir ki, görüş zaman etbarilə uzun çəksə də mahiyyət etibarilə nəticəsiz bitib: “Bugünkü növbəti raunddan da torpaqlarımızın azadlığıyla bağlı konkret bir nəticə hasil olmayacağı öncədən bəlli idi”deyə müəllif danışıqlara yekun firkini ifadə edir.

Müəllif hesab edir ki, 30 ilə yaxın çəkən danışıqlarda, “atəşkəs rejmi” qurmaqda  məqsəd heç də Qarabağın Azərbaycana qaytarılması deyil, Ermənistanın kimin Rusiyanın, yoxsa ABŞ-ın nüfuz dairəsində qalmasından gedir”.

“Azadlıqinfo” isə fevralın 9-na təyin edilmiş parlament seçkiləri” ilə bağlı jurnalistlərin basqılara məruz qaldğını bildirir: “Azərbaycanda seçkiqabağı vəziyyət: jurnalistlərə “hücum edilir” sərlövhəli məqalə bu hallardan bəhs edir.

Müəllifin deməsinə görə, Yeni Azərbaycan Partiyasından deputatlığa namizədliyi verilmiş Kəmaləddin Qafarovun seçicilərlə görüşündə  jurnalistlərə güc tətbiq edilib, bununla bağlı video-görüntülərin olduğu iddia edilir. 

“Kəmaləddin Qafarov jurnalistlərə “tərbiyəsiz” dedi, mühafizəçiləri isə jurnalistləri yumruqlayırdılar, onların əl-qolunu burub vururdular.  Bizi çox pis vururdular”. Bunu jurnalist Sevinc Vaqifqızı deyir. Həm də əlavə edir ki, jurnalist Əvəz Hafizli də mühafizəçilər tərəfindən döyülüb.

S. Vaqifqızının deməsinə görə, 3-4 metr aralıda duran polislər isə heç nə olmamış kimi baş verənləri müşahidə edirdilər.

Rəsmi “Azərbaycan” qəzetinin İnternet saytı isə iqtisadi sahədə uğurlardan, qarşıdakı parlament seçkilərilə bağlı Mərkəzi Seçki Komissiyasının verdiyi qərarlardan bəhs edir,

“270 milyard dollar sərmayə, 51 milyard dollarlıq valyuta ehtiyatı” sərlövhəli məqalə bu xüsusda çoxsaylı məqalələrdən biridir.

Müəllif deyir ki, müstəqillik dövründən 2015-ci ilədək ölkə iqtisadiyyatına 206 milyard dollar həcmində investisiya cəlb olunub, amma  2019-cu ildə bu rəqəm 270 milyad dollar həcminə yüksəlib, yəni 5 ilə 64 milyard manatlıq investisiya artımı qeydə alınıb. Müəllif davam edərək deyir ki, bu müddətdə ölkədə ÜDM 3.3 dəfə, valyuta ehtiyatları 28 dəfə artıb.

Müəllifə görə, bu uğurların səbəbi isə Azərbaycanın daxilində risklərin olmaması, ölkədəki sabitlik, davamlı inkişaf və Azərbaycan hakimiyyətinin böyük imkanlar yaradan və hazırda həyata keçirilən geniş islahatlar gündəliyinə mali olmasıdır.

“Oxu.az” saytı “Koronavirus dəhşəti davam edir: Ümumdünya Səhiyyə Təşkilatı beynəlxalq fövqəladə vəziyyət elan etdi” sərlövhəli məqalədə son həftənin dünya gündəminə dönən koronavirusun yayılması ilə bağlı vəziyyət hqda yazır.

Müəllif  deyir ki, Çinin Uhan şəhərindən yayılan virus nəticəsində ölənlərin sayı 170 nəfərə çatıb, virusa son olaraq Tibetdə də rast gəlinib, beləliklə virus 1.4 milyard insanın yaşadığı ölkənin bütün bölgələrinə yayılıb. 

Yazıda vurğulanır ki, Ümumdünya Səhiyyə Təşkilatı (ÜST) isə bu virusla bağlı beynəlxalq fövqəladə vəziyyət elan edib, artıq bəzi ölkələr Çinlə sərhədləri bağlamaq, bu ölkənin vətəndaşlarına viza məhdudiyyəti qoymaq qərarı verib.

Müəllifin deməsinə görə. Çindən başlayan virus epidemiyası Tayland, Cənubi Koreya, Yaponiya, Sinqapur, Vyetnam, Malayziya, Kamboca, Şri Lanka, Nepal, Filippin, Hindistan, Finlandiya, Fransa, Kanada, ABŞ, Avstraliya, BƏƏ və Almaniyada da qeydə alınıb.  

 “Bizimyol-info” seçkilərlə bağlı məsələ barədə yazır. “Deputatlığa namizədliyini geri götürənlərin sayı 312 nəfərə çatıb” sərlövhəli yazıda müəllif bir sıra namizədlərin seçkidən geri çəkildiklərini bildirir.

Müəllif deyir ki, Azərbaycanda 2020-ci ilin fevralın 9-na təyin edilmiş növbədənkənar parlament seçkilərində namizəd kimi iştirak etmək üçün 2431 nəfər müraciət edib.

Mərkəzi Seçki Komissiyasının (MSK) saytında  deyilir ki, deputatlığa namizədliyi qeydə alınmış 1637 nəfərdən indiyə qədər 312 nəfəri namizədliyini geri götürüb. Hazırda deputatlığa namizədlərin sayı 1325 nəfərdir.