İsa Qəmbər AXC qurucularının xatirəsini əbədiləşdirməyə çağırıb

Bakı/31.01.20/Turan: Bu gün Azərbaycan Xalq Cümhuriyyətinin (1918-20-ci illər) və Müsavat Partiyasının qurucusu Məhəmməd Əmin Rəsulzadənin 136 illiyi münasibətilə onun Novxanı qəsəbəsindəki abidəsinin önündə anım tədbiri keçirilib.

Yüzlərlə insanın qatıldığı tədbir Müsavat Partiyası tərəfindən təşkil edilib.

Ksiya iştirakçıları Rəsulzadənin və digər cümhuriyyət qurucularının xatirəsinin əbədiləşdirlməsinin vacibliyini qeyd ediblər.

Müsavat Partiyasının keçmiş başqanı İsa Qəmbər bildirib ki, Müsavat Partiyası son illər hakimiyyətdən dəfələrlə Xalq Cümhuriyyətinin liderlərinin xatirəsinin əbədiləşdirilməsini tələb edib. 

“Eyni zamanda biz zaman-zaman ziyalılarımıza müraciət etmişik. Onlara təklif etmişik ki, bu müqəddəs dəyərləri qorumaq, onları populyarladırmaq üçün təkcə  elmi araşdırmalar deyil, həm də ictimai addımlarla çıxış etsinlər. Müsbət bir haldır ki, son vaxtlar ölkə ziyalılarının önəmli bir hissəsi bir araya gələrək Məhəmməd Əmin Rəsulzadənın Ev muzeyinin bərpası ideyasını aktuallaşdırıblar, bu istiqamətdə addımlar atıblar. Biz bu addımı bəyənirik. Baxmayaraq ki, çox təəccüblüdür ki, bu işi görən insanlar bu ideyanın əsas daşıyıcısı Müsavat Partiyası rəhbərliyi ilə məsləhətləşmədən, müsavatçıları bu işə cəlb etmədən öz tərəflərindən bu addımı atıblar.

Ev muzeyinin yaradılması minimum bir işdir. Rəsulzadənin abidəsini Bakının ən yüksək nöqtəsində  ucaltmaq lazımdır. Bakı Dövlət Universitetinə Rəsulzadənin adı qaytarılmalıdır. Rəsulzadənin və  digər cümhuriyyət qurucularının xatirələri əbədiləşdirilməlidir”, - İ.Qəmbər deyib.

9 fevral parlament seçkilərinə toxunan İ.Qəmbər seçkilərdə fəal iştiraka və Müsavat Partiyası namizədlərinə səs verməyə çağırıb.0-