Media-icmal 31.05.21

Türkiyənin Qafqazda artan nüfuzuna görə Ermənistanın narahatlığı, Azərbaycanın hərbi bloklara qoşulmamasının səbəbləri, Bakıda bağ evlərinin bahalaşması və sair məsələlər medianın aparıcı mövzuları sırasındadır.

“Yenisabah”  saytı “Köçəryan Rusiyaya yalvarır: Türkiyəni dayandırın” sərlövhəli məqalədə Türkiyənin Qafqazda artan nüfuzu və Ermənistan-Rusiya münasibətləri dəyərləndirlir. 

O, Türkiyənin regionda artan nüfuzundan narahatlıq ifadə edib: “Bizi narahat edən Türkiyənin rolunun getdikcə regionda artmasıdır. Bu, açıq-aşkar görünür”.

Köçəryana görə, Türkiəni dayandıra biləcək yeganə ölkə Rusiyadır. “O baxımdan Moskva ilə münasibətlərimizi dərinləşdirməliyik” deyə Ermənistanın keçmiş prezidenti Robert Köçəryan bildirib. O, Ermənistan üçün Rusiyanı əvəz edəcək ikinci ölkənin olmadığını söyləyib.

O vurğulayıb ki, Ermənistan məhsullarını Türkiyəyə deyil, Rusiyaya ixrac etməlidir, Avropada heç kim ermənilərin istehsal etdiyi məhsulları gözləmir, Rusiya isə Ermənistan məhsullarını öz bazarında  həmişə gözləyib.

“Azpolitikainfo”  saytı isə indiki şəraitdə Azərbaycanın hansı addımı atmalı  olmasını deputat Fəzail Ağamalı ilə müzakirə edir.

Deputata görə, Azərbaycan Xalq Cümhuriyyəti dövründəki sərhədlərini bərpa etməli, Kollektiv Təhlükəsizlik Müqaviləsi Təşkilatına daxil olmamalıdır.

Deputat vurğulayır ki, müasir Azərbaycan dövləti 1918-1920-ci illərdəki Azərbaycan Xalq Cümhuriyyətinin (AXC) varisi elan edilib.

Onun fikrincə, o zaman Azərbaycanın 1918-1920-ci illərdəki ərazilərinin varisliyi də təmin olunmalıdır. Lazım gələrsə, bunun üçün silahlı qüvvələrin  imkanlarından  istifadə edilməlidir.

Azərbaycanın Kollektiv Təhlükəsizlik Müqaviləsi Təşkilatına üzvlüyünə gəlincə, Fəzail Ağamalı deyir ki, Azərbaycan bitərəf siyasət yürütdüyü üçün NATO-ya, ya Kollektiv Təhlükəsizlik Müqaviləsi Təşkilatına daxil ola bilməz, çünki onun bugünkü mövqeyi bunu tamamilə istisna edir.

“Bizimyolinfo.az”  saytında isə istirahət üçün qiymətlərin baha olmasını “Yay gəlir, istirahət üçün qiymətlər də istilənir” sərlövhəli məqalədə müzakirəyə çıxarılır. 

Müəllif deyir ki, yay mövsümü başlayan kimi bağ və həyət evlərinin qiyməti artır, şəhərin sahil zolağı qəsəbə və kəndlərində bağ və həyət evlərinin kirayə qiyməti 1000 manatdan başlayır.

Əmlak məsələləri üzrə ekspert Elnur Fərzəliyevin sözlərinə görə, adətən bağ evlərinin satışı və kirayəsi may - iyun aylarından hərəkətə keçir.

Onun fikrincə,  bu il ölkədaxili iqtisadi böhran, iş yerlərinin bağlanması hər kəsin büdcəsinə təsir edib. Buna görə də bağ evlərinin qiymətləri keçənilki kimi deyil, ondan əvvəlki ildən də ucuz olacaq.

Fərzəliyevə görə, bölgələrə gəldikdə isə keçən il rayonlara gediş-gəlişin bağlı olması ilə əlaqədar bölgələrdə kirayə evlər, otellər, hostellər, istirahət mərkəzlərin 70 faizi bağlandı

Bu il istirahət edənlər Qəbələ, İsmayıllı, Quba, Xaçmaz, Lənkəran və sair zonalara üz tutacaqlar, demək olar ki, zonalara axın artıq başlayıb. Bakıda bağ evlərinin qiymətləri 25-30% enəcək.

Hazırda Bakıda bağ evlərinin kirayə qiyməti 1000 manatdan başlayır. Bakıda ayı 12 min manata kirayə olan villa və bağ evləri də var.