Məhkəmə AXCP fəalının üzərinə borc öhdəliyi qoyaraq, sərbəst buraxıb  

Bakı/19.04.22/Turan: Aprelin 19-da Tovuz rayon Məhkəməsi hakim Nofəl Mustafayevin sədrliyi ilə Azərbaycan Xalq Cəbhəsi Partiyasının (AXCP) fəalı Elxan Əliyevdən ərizə alaraq onu sərbəst buraxıb.

Elxan Əliyevin bildirdiyinə görə, 2019-cu ildə sement şitrkətinin şikayəti üzrə keçirilən inzibati iş üzrə məhkəmə qətnaməsi ilə onun üzərinə 8 050 manat borc öhdəliyi qoyulub.  

"Tovuz rayon Məhkəməsi bu inzibati iş üzrə mənim üzərimə 8050 manat borc öhdəliyi qoyub. Mən həmin borcun 5800 manatını Orxan adlı məhkəmə icraçısına ödəmişəm. Buna baxmayaraq, məhkəmə icraçısı vəsaiti zərərçəkənə qaytarmayıb. Sonra zərərçəkən şəxs ölüb. İcraçı həmin pulu mənimsəyib. Orxan adlı icraçı başqa şəxslərə qarşı da dələduzluq etdiyinə görə həbs edilib. Bundan sonra Məhkəmə Qərarlarının İcrası və Probasiyası şöbəsi mənim barəmdə axtarış elan edib. Zərərçəkən vəfat etdiyinə görə inzibati icraata xitam verilməli idi. Buna baxmayaraq, məhkəmə işə xitam verməyib. Öhdəliyim və axtarışa verilməyim ilə bağlı da mənə hər hansı xəbərdarlıq edilməyib", deyə o qeyd edib.

Əliyev bildirib ki, bu gün, aprelin 19-da keçirilən məhkəmədə axtarış qərarından xəbəri olmadığı, bu barədə ona xəbərdarlıq edilmədiyi, icra məmurlarının onunla əlaqə saxlamadığı barədə ərizə verib.

"Məhkəmə mənim ərizəmi nəzərə aldı və bu gün məhkəmənin qətnaməsi mənə təqdim edildi. Qətnamədə 8050 manat borc öhdəliyi yazılıb. Mən bu qətmanədən apellyasiya şikayəti verəcəyəm. Çünki zərərçəkən şəxs vəfat edib. Bu halda işə xitam verilməlidir. Digər tərəfdən, borc öhdəliyimin 5 800 manatını ödəmişəm", deyə o qeyd edib.

Elxan Əliyev bu il martın 19-da İnzibati Xətalar Məcəlləsinin 535.1-ci (polisin qanuni tələbinə tabe olmamaq), 510-cu (xırda xuliqanlıq) maddəsi ilə 30 sutka inzibati qaydada həbs olunub.

AXCP onun həbsinin səbəbini tənqidi yazıları ilə izah edib. Daxili İşlər Nazirliyi konkret bu iddiaya münasibət bildirməyib. Amma adətən qurum Azərbaycanda insanların tənqidi mövqelərinə görə həbs edilməsi ilə bağlı deyilənləri əsaslı saymır.

Elxan Əliyev deyib ki, inzibati həbsdə olarkən ona siyasi mövqeyindən geri çəkilməsə həbs ediləcəyi barədə xəbərdarlıq edilib.

Mən siyasi mövqeyimdə qalacağımı bildirdim və həbsdən çıxan kimi 2019-cu ildə başa çatan məhkəmə qətnaməsi ilə saxlanıldım", deyə o qeyd edib.

Öz növbəsində, Daxili İşlər Nazirliyinin Mətbuat Xidmətinin Gəncə regional qrupundan bildiriblər ki, Elxan Əliyevin Tovuz rayon Məhkəməsi qarşısında borca görə öhdəliyi olduğundan o, məhkəmə qarşısına çıxarılıb. -03-