Mətbuat-Monitorinq 02-03.03.14

Rəsmi qəzetlər dövlət başçısı İlham Əliyevin xarici ölkə səfirlərini qəbul etməsi haqda xəbərləri ilk plana çıxarıb.
       
“Azadlıq” qəzeti Azərbaycan hökumətində bir qrupun “nurçu”lara savaş açmasını ilk səhifəyə çıxararaq bunu “Türkiyə olaylarının iqtidarı parçalaması” adlandırır.
Keçmiş vicdan məhbusu Cabbar Savalanlıya Sumqayıt Şəhər Məhkəməsinin qərarı ilə 20 sutka inzibatı cəza verilib.
Deputat Qənirə Paşayeva onun “nur”çuluq cərəyanına mənsub olması haqda  xəbər yayanları məhkəməyə verməyə hazırlaşdığını bildirib.
“Sovetski”də evlərin sökülməsinə 1500 manatdan artıq kompensasiya ödənməyəcəyi haqda rəsmi bəyanatı qəzet “hökumətin əhalini aksiyaya sürükləməsi” kimi dyərləndirir.
Ölkə siyasiləri ABŞ Dövlət Departamentinin insan haqlarının durumuna dair hesabatının Azərbaycana aid hissəsini obyektiv adlandırıblar.
   
“Yeni Müsavat” Ukraynadakı hadisələrə Rusiyanın münasibətini təhlil edərək “Qarabağı da Krım təhlükəsini gözləməsi” kimi qənaəti ilk səhifəyə çıxarıb.
Qəzet ölkə uşaqlarının təhcizatı üçün Bakıda 1100, bütün ölkədə isə 10 min yeni uşaq bağçasının tikilməsinə ehtiyacın olduğunu, buna baxmayaraq Əmlak Komitəsinin 82 bağçanı iş adamlarına satdığını yazır.
Ukrayna hadisələrinə toxunan qəzet Qərbin Kremlə xəbərdarlığını, səfirlərini Moskvadan geri çağırmasını, Ukrayna ordusunun döyüş hazırlığına gətirilməsini “Ukraynaya müdaxilənin dünyanı ayağa qaldırması” kimi dəyərləndirir.
Qəzetin iddiasına görə,  ölkədə vəhabilərin sıxışdırılması iqtidar daxilindəki qrupların savaşı halına gəlib, vəhabilər Dini Komitənin önündə aksiyaya hazırlaşırlar.
Qəzet mənbələrinə istinadən keçən ilin sonunda Sumqayıtda silahlı atışma zamanı həbs edilən 50-yə yaxın vəhabinin gizlicə azad edilməsi kimi sensasion məlumat yayıb.