Mətbuat-Monitorinq 08.09.15

Rəsmi qəzetlər dövlət başçısı İlham Əliyevin ikinci dərəcəli yeni sərhəd gözətçi gəmisilə tanış olması haqda xəbəri ilk səhifələrdə yerləşdiriblər.

“Azadlıq” qəzeti Beynəlxalq Bankın “kredit qalmaqalları” ilə bağlı yeni həbs dalğasının başladığını yazaraq bu dəfə kredit götürən sahibkarları himayə edən məmurların hədəfə gələcəklərini manjetə çıxarıb.

Azərbaycanlı mühacirlər Heydər Əliyev Fondunun Parisin “Pale Royal” meydanında təşkil etdiyi “Azərbaycan şəhərçiyi”ndəki stendlərə həbsdə olan şəxslərin fotolarını yerləşdirərək Azərbaycandakı repressiyalara etiraz ediblər. 

Azərbaycanın Avstraliyadakı səfirlyinin keçmiş əməkdaşı Anar Həsənov bu ölkədən sığınacaq istəyib.  Qəzet bu faktı öncə diplomat Arif Məmmədovun Avropada sığınacaq istəməsi fonunda “daha bir diplomatla qalmaqal” adlandırır.

Qəzet vaxtilə Xalq Cümhuriyyətinin qadınların səsvermə azadlığını tanıyan Azərbaycanda indi ictimai həyatda fəal xanımların həbsinə “indi bizi xanımları həbsə atan ölkə kimi tanıyırlar” şərhini verir.

İtaliyanın “Espresso” qəzeti Azərbaycanın ailə hakimiyyəti tərəfindən idarə edilən, ən çox korrupsiyalaşan, ölkə olması haqda məqalə dərc edib.

“Ekspress”   tələbə adı qazanan 1000 nəfərə yaxın tələbənin təhsil xərci ödəyə bilməməsi üzündən oxumaqdan imtina etməsini manjetə çıxarıb.

“Novoe Vremya”  Avropa Oyunlarının təşkililə bağlı tikintilərə ayrılan 120 milyon manat subsidiyanın Nazirlər Kabinetindən hələ də alınmamasına “tikinti şirkətlərinin çöküşü, sifarişçilərə “milyonlar”la atıblar” mövqeyini ifadə edir.

“Bizim yol” ölkədə bahalaşmanın ikinci dalğasının başladığını yazaraq ərzaq məhsulları, gündəlik tələbat mallarının 15-50% arasında bahalaşmasını ilk səhifəyə yerləşdirib.

Ölkədə hər şagird üçün çəkilən 200 manat xərcin böyük hissəsinin inhisarçıların cibinə getməsi iddiasına “məktəblidən qazanan monopolist” mövqeyini bildirir.

Mərkəzi Bankın bir ayın içində ehtiyatlarının yarısını itirməsinə toxunan ekspertlər hökuməti təcili antiböhran proqramı hazırlamağa çağırırlar.

Neft pulları hesabına yaradılan iş yerlərinin neftin ucuzlaşması ilə bağlandığını deyən ekspertlər işsizliyin ölkədə əsas problemlərdən birinə döndüyünü bəyan edirlər.    

“Yeni Müsavat”  taksi xidmətinin lisenziyalaşdırılmasının ASAN-xidmətə tapşırılmasını nəqliyyat naziri Ziya Məmmədovun portfelsiz qalması kimi dəyərləndirərək ilk səhifəyə çıxarıb.

Aksiz vergilərinin yenidən artırıla biləcəyini deyən ekspertlər hökumətin büdcəni doldurmaq üçün vergi daxilolmalarının artırılması niyyətinin açıq hiss olunduğunu  nəzərə çatdırırlar.