Rəsmi və iqtidaryönlü qəzetlər dövlət başçısı İlham Əliyevin Goranboy rayonunun sosial-iqtisadi inkişafı üçün 1 milyon manat vəsait ayırması haqda sərəncamının mətnini yayıblar.
Bundan əlavə, bu qəzetlərdə etiraz elektoratının birliyi olan Milli Şura, “Freedom House” və “Human Rights Watch” beynəlxalq hüquq-müdafiə təşkilatları böhtan və təhqirlərə məruz qalıb.
“Azadlıq” qəzeti həbsdə olan keçmiş səhiyyə naziri Əli İnsanovun yaydığı Milli Şuraya dəstək bəyanatı haqda xəbəri ön səhifəyə çıxarıb
Ölkənin protest elektoratını öz ətrafında birləşdirən Milli Şuranın ilk sessiyasının iyunun 21-də Müsavat Partiyasının qərargahında keçirilməsi haqda qərar qəbul edilib. Rüstəm İbrahimbəyovun namizədlyinin Milli Şuranın sabahkı sessiyasının gündəliyindən çıxarılması haqda iqtidara bağlı saytların yaydıqları xəbərləri qəzet “iqtidarın Milli Şura isterikası” kimi dəyərləndirir.
İnsan haqlarının durumuna görə “Freedom House” təşkilatının Azərbaycana olan tənqidlərinə hüquq müdafiəçisi Novella Cəfəroğlunun etirazına Müsavat Partiyasının başqanı İsa Qəmbər “təcrübəli hüquq müdafiəçisindən məsələlərə daha prinsipial mövqe gözlədiyi” bəyanatını səsləndirib.
Naxçıvan başçısı Vasif Talıbovun biznes ortağı olan türkiyəli iş adamı Emin Ucar Naxçıvandakı şirkətlərə terrorçu-PKK təşkilatı ilə əlaqələri olan kürdləri cəlb etdiyi bildirilir.
“Zerkalo” İranda rəhbərliyin dəyişməsilə İran siyasətinə “Azərbaycan və digər dövlətlərin münasibətlərdə əhəmiyyətli dəyişiklik gözləntiləri əsaslıdırmı? mövqeyini ifadə edir.
Qəzet rəsmi sənədlərlə artıq Azərbaycan ərazisi sayılan Xraxoba və Uryanoba ərazilərinin Dağıstana qaytarılması tələbilə separatçı “Sadval” təşkilatının iyunun 29-da Rusiyanın bəzi şəhərlərində aksiya keçirmək qərarını “separatçıların yenə suyu bulandırması” adlandırır.
“Ekspress” Yunanıstanın “DESFA” qaz şirkətinin ARDNŞ-ə 400 milyon avroya satılacağını bildirir.
Ölkədə taxıl biçini üçün kombayn çatışmır, kombaynların sayı 2,6 dəfə azalıb.
“Exo” yazır ki, Bakı metropoliteninin “28 may” stansiyasına girişin bağlı olması üzündən metropoliten hər ay 10 min sərnişin itirir.
“Novoe Vremya” bir sıra Qərb dövlətlərinin rəsmi Bakıya “NABUCCO”da iştirak etmək müraciətinə ““NABUCCO”da iştirak əvəzinə seçkilərin legitimləşdirilməsi” şərhini verir.
“Human Rights Watch” beynəlxalq müdafiə təşkilatının Azərbaycanda insan haqları ilə bağlı Avropa komissarı Barrozoya müracətini “həyəcan təbili çalması” sayır və “Brüssel cavab verəcəkmi?” mövqeyini sərgiləyir.
“Bizim yol” Milli Şuranın üzvü, müdafiə nazirinin keçmiş müavini İsa Sadıxovun axtarışa verilməsini “Azərbaycana dönüşünün əngəllənməsi” kimi dəyərləndirir.
“Yeni Müsavat” Milli Şuranın üzvü, hazırda Avropada mühacirətdə olan polkovnik İsa Sadıxova qarşı rəsmi Bakının cinayət işi qaldırmasını “Milli Şuraya qarşı repressiyanın başlanması” sayaraq önə çəkib.
Avstriyada Azərbaycan pulunun çap olunması üçün 14 milyon avro rüşvət qalmaqalına görə Avstirya Mərkəzi Bankının vitse-qubernatoru Volfqanq Dukatsek vəzifəsindəın azad edilib.
Gədəbəyin Seyidlər kənd sakini, Qarabağ əlili torpaq problemilə bağlı müraciətlər ünvanladığı üçün İcra Hakimiyyəti rəhbərliyi əlilin bacılarını gecə ilə oğurlatdırıb və şikayətlər davam edəcəyi halda bacılarının videolarını yayacağı ilə hədələyib.
Rəy yaz