Mətbuat-Monitorinq 27.02.15

Rəsmi qəzetlər Xocalı faciəsi qurbanlarının anılması mərasimini ilk səhifələrdə yerləşdiriblər. Bu qəzetlər Mingəçevir Sənaye Parkının fəaliyyətinin təmin edilməsilə bağlı 2 milyon manatın ayrılması haqda sərəncamın mətnini də dərc ediblər.

“Azadlıq” qəzeti İngiltərə mətbuatının Avropa Olimpiya Oyunları ilə bağlı Azərbaycana gələcək bütün komandaların, o cümlədən erməni komandasının da xərcini Azərbaycan tərəfin çəkəcəyini ifşa etməsini manjetə çıxararaq bunu ironiya ilə “İlham Əliyevin müdhiş “olimpiya sirri” adlandırıb.

AXCP sədri Əli Kərimli isə bu addmı rəsmi Bakının xalq qarşısında məsuliyyətsizliyi kimi dəyərləndirir.

Qəzet ABŞ mediasının Əliyev rejimini tənqid edərək Azərbaycanın “kiçik Rusiya”ya döndüyünü, Əliyevin isə Putini özünə nümunə götürdüyünü” yazır.      

Qanunsuz silah saxlamaq bəhanəsilə saxlanılan AXCP  fəalı Qadir Xudabaxşıyev vəkili ilə görüşdə siyasi fəaliyyətinə görə həbs olunduğunu nəzərə çatdırıb.

Hüquq müdafiəçisi Taleh Xasməmmədov xuliqanlıq bəhanəsilə saxlanılıb və barəsində 3 aylıq həbs qətimkan tədbiri seçilib.

Ölkədə süni qiymət artımının və qıtlığın davam etdiyini yazan qəzet bunu oliqarxiyanın hökumətə savaş açması kimi dəyərləndirir.

Ekspertlər manatın devalvasiyası ilə ölkə banklarına etibarın azaldğını, banklarda əmanətlərin həcminin yox, problemli kreditlərin xüsusi çəkisinin artacağını bildiriblər.

“Ekspress”  vitse-spiker Ziyafət Əsgərovun İranla Ermənistan arasındakı isti münasibətləri tənqid etməsini önə çəkib.

“Exo” manatın ucuzlaşmasından sonra valyuta və istehlak bazarında möhtəkirliyə qarşı mübarizə getməsini diqqət mərkəzinə çəkib.

“Novoe Vremya”  ad çəkmədən Antiinhisar Xidmətinin tanınmış Azərbaycan oliqarxının iki çoxaspektli müəssisəsini bağlamasını önə çəkərək bunu “Azərbaycanda oliqarxların müharibəsinin başlaması” hesab edir.

Qəzet insan haqlarının ağırlığına görə Azərbaycanın ciddi tənqidlərə  məruz qalması ilə bağlı iqtidara “bu həddə çatdırmaq nəyə lazlm?” kimi “müdrik tövsiyə” verir.

“Bizim yol” qəzeti inflyasiya qorxusundan irəli gələrək əhalinin banklardan pullarını geri çəkməsini ilk səhifəyə çəkib.

Xuliqanlıq bəhanəsilə tutulan hüquq müdafiəçisi Taleh Xasməmmədovun məhkəməsində qardaşı damarlarını doğrayıb.    

“Yeni Müsavat” həbsdə olan jurnalist Xədicə İsmayıl və hüquq müdafiəçisi Leyla Yunusun, yeri naməlum olan RATİ rəhbəri Emin Hüseynovun gizli yazışmalarının iqtidarın əlinə keçdiyini, buna görə Qərbin onları ölkədən qaçırmaq planının baş tutmadığı iddiasını önə çəkir və “həbsdəki “üçlüyü kim satıb?” sualını gündəmə gətrir.

Rəsmi Bakının Avropa İttifaqı ilə assosiasiya sazişini Riqa sammitində də imzalamayacağını yazan qəzet bunu “rəsmi Bakının Avropa İttifaqı ilə bağlı xoş gözləntilərə nöqtə qoyması” adlandırır.

“Amnesty İnternational” təşkilatı yaydığı hesabatda Azərbaycanı siyasi həbslərə görə sərt tənqid edib, rəsmi Bakının tərəfdarları isə həmişə olduğu kimi yenə də bunu antiazərbaycançılıq, qərəz və qarayaxma adlandırırlar.

Qəzet manatın devalvasiyasından sonra ölkə apteklərində dərman qıtlığının yarandığının,  marketlərdə qiymətlərin hər gün artdığının vətəndaşlar arasında ciddi narahatlıq yaratmasını qeyd edir.