Mətbuat-Monitorinq 29.08.12

Rəsmi qəzetlər dövlət başçısı İlham Əliyevin Belorusa səfəri, görüşləri, ölkə iqtisadiyyatının dinamik inkişafı haqda məqalələr dərc ediblər. 

“Azadlıq” qəzeti Bakının Biləcəri qəsəbəsinin mərkəzi hissəsində 20-yə qədər ticarət obyektinin dağıdılmasını manjetə çıxarıb. 

    Tanınmış vəkil Qurban Məmmədov qəzetə açıqlamasında ölkədəki ictimai-siyasi duruma “Azərbaycan xalqı və dövləti bir qrup cinayətkarın yeminə çevrilib” şərhi verib. 

    Eks-prezident Əbülfəz Elçibəyin zəhərlənərək ölməsi haqda ölkə prokurorluğunu başladığı cinayət işinin əsassızlığına ölkənin tanınmış hüquqşünasları “prokurorluq belə diqqətcildirsə, niyə digər cinayətlərlə bağlı qulağına pambıq tıxayır?” mövqeyi ifadə ediblər.

    “Zerkalo” qəzeti İran-Azərbaycan münasibətlərində rəsmi Bakının “geriyə dönə bilmək nöqtəsi”ni keçdiyini iddia edir. 

    “Ekspress” qəzeti cəbhə bölgəsindəki hərbi hissədə düşən davada əsgər Sevmət Sarbalayevin əsgər Orxan Alıyevi bıçaqla qətlə yetirdiyini yazır.

    Qəzet ölkənin 9 bankının ziyanla işlədiyini, bu ilin ilk yarısında itkilərin 9,4 dəfə artdığını yazır. 

    “Exo” qəzeti iqtisadi fəaliyyətlə məşğul olanların yalnız 20%-nin istehsalatda bədbəxt hadisələrə və peşə xəstəliklərinə görə məcburi sığortaya cəlb edildiklərini nəzərə çatdırır. 

    “Bizim yol” qəzeti ölkənin neft gəlirlərindən tam asılı olması haqda hesabatı “iqtisadi çöküşü sübut edən şok hesabat” kimi dəyərləndirir. 

    İqtidarın AXCP sədri Əli Kərimli əleyhinə başladığı eks-prezident Əbülfəz Elçibəyin zəhərlədilərək vəfat etməsi kampaniyasının əks effekt verməsini YAP icra katibi Əli Əhmədov “bu işdən artıq Əli Kərimli faydalanmağa başlayıb” şəklində ifadə edib. 

    Qəzet qeyd edir ki, Quba rayon sakini bu il ali məktəbə daxil olan Novruz Məmmədov atası Ehtiram Məmmədov ilkin təhsil haqqını ödəmək istəmədiyi üçün onu qətlə yetirib.

    “Novoe Vremya” qəzeti ABŞ Dövlət Departamentinin Güney Azərbaycan məsələsini siyasi gündəmə gətirməsinə “Hər halda ABŞ Azərbaycan “kart”ından İrana qarşı istifadə edir?” münasibəti ifadə edir. 

    “Yeni Müsavat” qəzeti qeyd edir ki, Müsavat partiyası başqanı İsa Qəmbər “Azadlıq” radiosuna açıqlamasında 2013-cü il prezident seçkilərinə namizəd kimi qatılacağını bildirib.

    “Eks-prezident Əbülfəz Elçibəyin zəhərlənərək vəfat etməsi iddiaları iqtidar texnoloqlarının xüsusi hazırladıqları addımlardır”, - deyə Müsavat başqanı İsa Qəmbər ölkə prokurorluğunun başladığı cinayət işilə bağlı qəzetə açıqlama verib. 

    Qəzetin yazdığına görə, dövlət başçısı İlham Əliyevin qızlarının adına rəsmiləşdirilən Çovdar qızıl yatağından qızıl emalı üçün bu ilin sonuna kimi Daşkəsən rayonda zavod tikilib istifadəyə veriləcək. 

    Qəzet paytaxtda unun bahalaşdığını, çörəyin çəkisinin azaldığını nəzərə çatdırır.