M.Hacıbəyliyə �Əfqan Muxtarlı xəbərdarlığı�

Bakı/16.07.17/Turan: "Bastainfo" saytının baş redaktoru Mustafa Hacıbəyli bu gün, iyunun 16-da Baş Prokurorluqda olub. O, baş prokurorun birinci müavini Rüstəm Usubov tərəfindən saytda dərc olunan bəzi yazılarla əlaqədar çağırılıb. Bu haqda Mustafa Hacıbəyli bildirib.

Jurnalist prokurorluğa vəkili ilə getsə də, vəkili Rüstəm Usubovun otağına buraxmayıblar.

M.Hacıbəylinin bildirdiyinə görə, prokurorluq istintaq başa çatmamış cinayət işləri ilə bağlı yayılan bəzi məlumatların istintaqa xələl gətirdiyini düşünür.

"Söhbət "Əfqan Muxtarlının başına 300 min dollar pul qoyulub?", "Son həbslər və Müsavat", "Əfqan Muxtarlıdan yeni heyrətamiz xəbər" yazılarından gedir. Guya həmin yazılarda istintaqın aparılmasına xələl gətirən və ictimaiyyəti çaşdıracaq məlumatlar var", deyə jurnalistə prokurorluqda bildiriblər.

M.Hacıbəyli sözügedən yazıların Gürcüstan mediasına istinadən yayıldığını və insan oğurluğu barədə faktın Gürcüstan prezidentinin də vurğuladığını Rüstəm Usubovun diqqətinə çatdırıb: "Rüstəm Usubov iradları qəbul etmədi. O, Azərbaycanın özünün media haqqında qanunlarının olduğunu və bu qanunlara əməl olunmasının vacib olduğunu bildirdi", deyə jurnalist qeyd edib.

M.Hacıbəyliyə adı çəkilən yazılara görə rəsmi xəbərdarlıq olunub.

Bu arada, Müsavat Partiyası Mustafa Hacıbəylinin Baş Prokurorluğa çağırılması ilə bağlı bəyanat yayıb. Partiya hesab edir ki, Avropa Parlamentinin bir gün əvvəl qəbul etdiyi "Əfqan Muxtarlı hadisəsi və Azərbaycanda medianın vəziyyətinə dair" qətnamədən dərhal sonra Mustafa Hacıbəylinin baş prokurorun müavini Rüstəm Usubovun yanına çağırılması Müsavat Partiyasına qarşı təzyiq, ifadə azadlığına qarşı total basqının davamıdır.

Partiya mediaya basqılara, ifadə azadlığına qarşı təzyiqlərə son qoyulmasını, jurnalist Əfqan Muxtarlının dərhal azad edilməsini tələb edib. -0-