Milli Şura və “Müdafiə xətti” təşkilatı hakimiyyəti həbs olunanlara qarşı işgəncələrə son qoymağa çağırıblar

Bakı/25.09.20/Turan: Demokratik Qüvvələrin Milli Şurası və “Müdafiə xətti” hüquq- müdafiə təşkilatı hökumətin həbs edilmiş opponentlərinə qarşı işgəncələrin tətbiqinə görə Azərbaycan hakimiyyətini pisləyən bəyanatlarla çıxış ediblər.

Bəyanatlar Xalq Cəbhəsi Partiyasının fəalı, həbsdə olan Aqil Məhərrəmlinin sosial şəbəkələrdə dərc olunan məktubu səbəb olub. Fəal koronavirusa yoluxanların  2 saylı koloniyada saxlanma şəraitini və Penitensiar Xidmətin vərəmli xəstələrin müalicə müəssisəsində məhbuslarla rəftarı təsvir edir.

Vərəm müəssisəsində (“Tubzon”) qaldığı 41 gün ərzində yoluxanları karserə salıblar, dərman, döşək, sabun  verməyiblər, tualetə buraxmayıblar.

Məhbusların vəziyyəti pisləşdikdə həkim çağırılmayıb. Hiddətlənəni döyüblər  və çılpaq vəziyyətdə metal yataqların üzərinə  qoyublar. Telefonla zəng etmək üçün 5 manat pul tələb ediblər.

Milli Şura təsvir olunan faktları hakimiyyətin ənənəvi idarəetmə üsulu olaraq işgəncələrdən istifadə kimi qiymətləndirir. Buna ötən il oktyabrın 19-da Milli Şuranın mitinqindən sonra start verilib. Məhz o zaman AXCP və Milli Şuranın rəhbərləri və fəalları döyülüb, saxlanılıb, həbsdə işgəncələrə məruz qalıblar.

Milli Şura beynəlxalq təşkilatları bu qanunsuzluğa reaksiya verməyə, ölkə xalqını isə hakimiyyətin yürütdüyü siyasətə etiraz etməyə çağırıb.

Öz növbəsində “ Müdafiə xətti”  Aqil Məhərrəmli və digər müxalifətçilərlə bu cür davranışa görə Penitensiar Xidməti, Ədliyyə Nazirliyinin müalicə müəssisəsində koronavirusa yoluxmuş şəxslərlə qeyri-insani rəftarı kəskin pisləyib.-03D-