Müdafiə tərəfi dini fəalın həbsindən şikayət verib

Bakı/12.07.21/Turan: "Müsəlman Birliyi" Hərəkatının fəalı Razi Hümbətovun həbsindən apellyasiya şikayəti verilib. Bu barədə Turan-a vəkil Cavad Cavadov bildirib.

Bundan əlavə, vəkil Hümbətovun saxlanmasından məhkəmə nəzarəti qaydasında şikayət verib. Müdafiə tərəfi hesab edir ki, onun saxlanması qanun pozuntusu ilə müşayiət edilib.

Belə ki, iyulun 7-də Ceyranbatan qəsəbəsində saxlanıldıqdan sonra Hümbətovun yaxınları ilə əlaqə saxlamağa, istənilən vəkili dəvət etməyə imkanı olmayıb.

Bundan əlavə, polis orqanlarında onun saxlanması barədə ailə üzvlərinə məlumat verilməyib. Ancaq iyulun 8-də məlum olub ki, Nərimanov Rayon Məhkəməsi Cinayət Məcəlləsinin 234.4.3-cü maddəsi (külli miqdarda narkotik maddələrin qanunsuz dövriyyəsi) ilə ittiham irəli sürərək onun barəsində həbs qətimkan tədbiri seçib. Bu maddə üzrə onu 12 ilədək azadlıqdan məhrumolunma cəzası gözləyir.

Hazırda Hümbətov Penitensiar Xidmətin istintaq təcridxanasına köçürülüb.

Vəkil hələlik onunla görüşə bilməyib.

İstintaqı Daxili İşlər Nazirliyi Baş Mütəşəkkil Cinayətkarlığa Qarşı Mübarizə İdarəsi aparır.

"Müsəlman Birliyi" Hərəkatında Razi Hümbətovun həbsini sosial şəbəkələrdə hakimiyyəti tənqid etməsi, həmçinin gənclər arasında narkotik maddənin yayılmasına qarşı fəal mübarizə aparması ilə əlaqələndirirlər”, - təşkilatdan bildiriblər. -06D-