Müstəqil mətbuat nümayəndələri Elmar Hüseynovun xatirəsini yad ediblər

Bakı/02.03.22/Turan: "Monitor" jurnalının redaktoru Elmar Hüseynovun qətlindən 17 il keçir. Hər il olduğu kimi, martın 2-də ölkənin azad KİV-lərini təmsil edən bir qrup jurnalist Bakıdakı Yasamal qəbirstanlığında jurnalistin məzarı başında onun xatirəsini yad edib.

Jurnalistin məzarı başında çıxış edən Turan İnformasiya Agentliyinin direktoru Mehman Əliyev qeyd edib ki, Elmar Hüseynovun qətli ölkədə azad mətbuatı susdurmaq məqsədi daşıyırdı.

"Elmar Hüseynovun qətlindən sonra 17 il ərzində azad mətbuat, demək olar ki, tamamilə məhv edilib. Bu yaxınlarda qəbul edilmiş media haqqında qanun müstəqil KİV-lərin boğulması siyasətinin davam etdiyinin və gücləndiyinin daha bir təsdiqi olub. İndi artıq söhbət azad mətbuatın yox edilməsindən getmir, bu, artıq, demək olar ki, həyata keçirilib, indi artıq informasiya cəmiyyətinin tamamilə aradan qaldırılmasından söhbət gedir. Amma hakimiyyətin bütün səylərinə baxmayaraq, informasiya cəmiyyətini nəzarəti altına götürə bilməyib. Hesab edirəm ki, son nəticədə Azərbaycanda informasiya cəmiyyəti qalib gələcək", deyə Əliyev bildirib.

"Qanun" nəşriyyatının rəhbəri Şahbaz Xuduoğlu hesab edir ki, Elmar Hüseynovun qətlinin üstünün açılması siyasi iradədən asılıdır.

"Siyasi iradə olsa, peşəkarlardan ibarət ciddi istintaq qrupu yaradılsa, Elmarın qatilləri tapılıb cəzalandırılacaq", deyə Xuduoğlu bildirib.

Elmar Hüseynov 2 mart 2005-ci il tarixində öz mənzilinin qapısı ağzında güllələnib. Cinayətdən 17 il keçməsinə baxmayaraq, qətlin təqsirkarları indiyədək məsuliyyətə cəlb edilməyib. 

Jurnalistin ölümündən sonra onun həyat yoldaşı və azyaşlı oğlu Norveçə mühacirət edib.

E.Hüseynov 1967-ci ilin iyulunda Bakıda dünyaya gəlib.

Hüseynov jurnalistikaya 1995-ci ildə başlayıb, "Trend" agentliyinin həmtəsisçilərindən olub. 1996-cı ildə "Monitor" jurnalının əsasını qoyub. Müxtəlif illərdə "Bakinskiy bulvar" və "Bakinskie vedomosti" qəzetlərini dərc edib.

2017-ci ilin aprelində Avropa İnsan Hüquqları Məhkəməsi (AİHM) Azərbaycanda Hüseynovun qətlinin səmərəli təhqiqatının aparılmadığını etiraf edib.

AİHM Azərbaycan hakimiyyətinin üzərinə mərhumun həyat yoldaşına mənəvi ziyana görə 20 000 avro və məhkəmə xərcləri üçün 10 000 avro ödəmək öhdəliyi qoyub.

Azərbaycanın hüquq-mühafizə orqanları qətlin üstünü açmaq üçün bütün zəruri səyləri göstərdiklərini bildiriblər. Onların iddiasına görə, bu cinayətdə şübhəli bilinən şəxslər Gürcüstandadırlar və bu ölkənin hakimiyyəti onları təhvil vermir. -06В-