Müxalifətçi polisin təzyiqlərindən şikayət edir

Bakı/10.02.21/Turan:  Xalq Cəbhəsi Partiyası (AXCP) Lənkəran rayon təşkilatının sədri Nazim Həsənov dünən yerli polis idarəsinə aparılıb. Saat 17:00 radələrində onu polis əməkdaşlarının müşayiətilə şəhər idarəsinə aparıblar, üç saatdan sonra isə evə qaytarıblar.

“Polis idarəsinə nəyə görə aparıldığımı özüm də bilmirdim. Məni rəis müavini Yelmar Mehdiyev qəbul etdi. Saymazayana məni dövlətə qaşrı yazılar yazmaqda, dövləti devirmək istəyində suçladı. Mən də dedim ki, dövlət əleyhinə heç nə yazmamışam, biz hökumətə müxalifik, əgər qanunsuz nəsə yazmışamsa cavab verməyə hazır olduğumu bildirdim. Məni 5-10 sutka inzibati cəza ilə hədələdi. Mən də apardığımız mübarizədən geri çəkilən olmadığımızı söylədim”, - N.Həsənov Turan agentliyinə bildirib. 

Bundan sonra polis rəisinin köməkçisi N.Həsənovla analoji söhbət edib, sonra onu buraxıblar. Müxalifətçi polisin hərəkətlərini siyasi fəaliyyətlə əlaqədar ona təzyiq kimi qiymətləndirib.

Öz növbəsində, DİN-in KİV və ictimaiyyətlə əlaqələr şöbəsinin rəisi Elşad Hacıyev N.Həsənovun dediklərini "əsassız və həqiqətə uyğun olmayan" adlandırıb.

"Nazim Həsənovla profilaktik söhbət aparılıb, bundan sonra o sərbəst buraxılıb. Onun barəsində heç bir araşdırma yoxdur", - E.Hacıyev qeyd edib. -0-