Narkodilerlə toqquşma zamanı sərhədçi yaralanıb

Bakı/23.09.19/Turan: Sərhəddə şübhəli şəxsin zərərsizləşdirilməsi zamanı Azərbaycan sərhədçisi yaralanıb. Hadisə sentyabrın 20-də saat 21.05-də Cəlilabad-Yardımlı avtomobil yolunda Buravar kəndi yaxınlığında sərhəd zastavasının xidməti ərazisində baş verib.

İçərisində iki nəfər olan avtomobilin yaxınlaşması sərhəd naryadının diqqətini cəlb edib. Onlardan biri avtomobildən düşüb və saxlanc yerindən bağlamanı götürərək uzaqlaşmağa çalışıb. Sərhədçilər ona dayanmağı əmr ediblər, amma o, bu əmrə tabe olmayıb. O, saxlanılarkən müqavimət göstərib və baş leytenant Allahverdi İsmayılova bıçaq xəsarəti yetirib. Amma sərhədçi cinayətkarı silahsızlaşdırmağa müvəffəq olub. İsmayılova tibbi yardım göstərilib, onun vəziyyəti qənaətbəxş olaraq qiymətləndirilir.

Saxlanılan şəxs Cəlilabad rayon sakini Əliyev Elşən Dövlət oğludur (1975). Bağlamaya baxış zamanı 1 kq-dan çox marixuana, 1 kq-dan çox tiryək və 450 qr heroin aşkar edilərək götürülüb.

Onun gizlənən əlbiri də saxlanılıb. O, Naxçıvan AR Babək rayon sakini Quliyev Samir Vidadi oğludur (1979). Onun avtomobilindən 55 qr tiryək aşkar edilib və müsadirə edilib. Faktla bağlı əməliyyat-istintaq tədbirləri davam etdirilir, deyə Sərhəd Xidmətinin press-relizdə bildirilir. -06D-