Nazirlik sağlamlığı məhdud gənclərə dəstək sözü verir

Bakı/16.06.18/Turan: "Gənclərin əmək bazarına çıxış imkanlarına, eləcə də onların məşğulluğunun təminatına diqqət artırılacaq".

Əmək və əhalinin sosial müdafiəsi naziri Sahil Babayev bu gün, iyunun 16-da sağlamlıq imkanları məhdud gənclərlə görüşündə belə deyib.

Nazirliyin məlumatına görə, görüş Dövlət Sosial Müdafiə Fondunun 1 saylı Sağlamlıq imkanları məhdud gənclərin Peşə Reabilitasiya Mərkəzində olub.

Dövlətin sağlamlıq imkanları məhdud gənclərin reabilitasiyasına gərəkli dəstəyi verdiyini ifadə edən S.Babayev onların müxtəlif peşələrə yiyələnməsi üçün şəraitin yaradıldığını söyləyib.

Nazirin sözlərinə görə, sağlamlıq imkanları məhdud gənclərin əldə etdikləri peşə bacarıqları müqabilində əmək bazarına çıxış imkanlarına yiyələnmələrinə, məşğulluğunun təminatına diqqət artırılacaq.

"Eyni zamanda, həmin gənclərin müxtəlif iqtisadi fəaliyyət növləri üzrə özünüməşğulluğunun təminatı üçün müvafiq işlər aparılacaq. Sağlamlıq imkanları məhdud insanların öz üzərində çalışmaqla fiziki məhdudiyyətlərinə qalib gələrək böyük uğurlara nail ola bilməsinə dair həyatda kifayət qədər nümunələr var. Siz də daim öz bacarıq və qabiliyyətinizi təkmilləşdirməklə həyatda özünüzü təsdiq etməyə, uğur qazanmağa doğru irəliləməlisiz. Biz bu yolda daim sizə yaxından dəstək olacağıq", nazir sağlamlıq imkanları məhdud gənclərə xitabən bildirib.

Peşə Reabilitasiya Mərkəzi ilə tanış olan nazir həmçinin bildirib ki, gənclərin əl işlərinin satışının təşkili imkanları araşdırılacaq.--0--