Növbəti əfv olacaq?

İyunun 1-də hakimiyyət və vətəndaş cəmiyyəti nümayəndələrinin iştirakı ilə insan hüquqları üzrə İşçi Qrupun növbəti iclası olub.

İştirakçılar digər məsələlər sırasında siyasi məhbuslar mövzusunu da müzakirə ediblər. Bu barədə Turan-a Helsinki Vətəndaş Assambleyasının həmsədri Arzu Abdullayeva bildirib.

Son vaxtlar bir çox siyasi məhbus azadlığa buraxılsa da onların bir hissəsi hələ də həbsdədir. Bunlar REAL Hərəkatının lideri İlqar Məmmədov, keçmiş nazirlər Əli İnsanov və Nicat Quliyev, gəns fəallar Fərəc Kərimli, İlkin Rüstəmzadə, Abdul Əbilov, jurnalist Seymur Həzidir.

Bundan əlavə, hüquq müdafiəçiləri İşçi Qrupa vətəndaşların mülki işlər üzrə ədalətsiz məhkəmə qərarları ilə bağlı 100-dək şikayətini  təqdim ediblər.

Həmçinin fəallar QHT haqqında qanuna yenidən baxılmasını təklif ediblər. Çünki bu, indiki vəziyyətdə ictimai birliklərin fəaliyyətinə əngəl törədir.

İşçi Qrupun digər üzvü, Qadın Hüquqlarını Müdafiə Cəmiyyətinin rəhbəri Novella Cəfəroğlu da sözügedən məsələlərin müzakirə olunduğunu təsdiqləyib.

Qeyd edək ki, sonuncu dəfə hər iki tərəfin iştirakı ilə İşçi Qrupu martın əvvəlində əfvdən öncə  toplaşmışdı.

İyunda iki dövlət bayramı – Milli Qurtuluş Günü (15 iyun) və Silahlı Qüvvələr Günü (26 iyun) qeyd olunur. Bu münasibətlə əfv haqqında növbəti sərəncam ola bilər. Ancaq hələlik bu ehtimallar rəsmi mənbələr tərəfindən təsdiqlənmir.—06D--