Növbəti narkotik qaçaqmalçıları qrupundan 84 kq-dan çox narkotik götürülüb

Bakı/26.09.20/Turan: Sərhədçilər İranla sərhəddə növbəti böyük narkotik partiyasını keçirmək istəyən üç narkotik qaçaqmalçısını saxlayıb.

Sərhəd Xidmətinin mətbuat xidmətinin məlumatına görə, üç narkotik qaçaqmalçısı Beyləqan rayonunun Şahsevən kəndi yaxınlığında sərhədi keçib və sərhədçilər tərəfindən müşahidə olunub. Sərhədçilərin açdığı xəbərdarlıq atəşindən sonra onlar geriyə doğru qaçıblar. Həmin ərazidə axtarış tədbirləri keçirilib, axtarış tədbirlərinin nəticəsində kolluqların arasında gizlənən 1 nəfər şübhəli şəxs 4 ədəd bağlama ilə birlikdə saxlanılıb.

Bağlamalara baxış zamanı içərisində ümumi çəkisi 84 kq 660 qr narkotik vasitəyə oxşar maddələr (52 kq “tiryək”ə, 32 kq 650 qr “heroinə”ə, 10 qr “marixuana”ya və 120 ədəd “metadon-40” həbinə) aşkar olunub.

Saxlanılan şəxsin 1983-cü il təvəllüdlü Süleymanov Elşən Vaqif oğlu olması və əvvəllər narkotik vasitələrin qanunsuz dövriyyəsinə görə məhkum edilməsi müəyyənləşdirilib. Cinayətkar qrupun digər üzvlərinin müəyyənləşdirilməsi istiqamətində keçirilmiş təxirəsalınmaz əməliyyat-axtarış tədbirləri nəticəsində sərhədboyu ərazidə hərəkətdə olan “VAZ-2107” markalı avtonəqliyyat vasitəsi saxlanılıb.

Cinayətkar qrupun üzvləri törətdikləri cinayət əməlini etiraf edərək əraziyə narkotik vasitə götürməyə gəldiklərini bildiriblər. -02D-