Ölkə imtahan verir

Bakı/20.05.18/Turan: Bu gün (20 may) Azərbaycanda ölkənin ali və orta ixtisas təhsil müəssisələrinə növbəti qəbul imtahanı keçirilir. I və IV ixtisas qrupu abituriyentləri imtahan verir. Dövlət İmtahan Mərkəzinin (DİM) mətbuat xidmətindən Turan-a verilən məlumata görə, imtahan Bakı, Naxçıvan, Gəncə, Sumqayıt, Mingəçevir, Şəki, Bərdə, Göyçay, Şirvan, Lənkəran və Xaçmazda keçirilir.

Prosesə 229 rəhbər və orta ümumtəhsil məktəblərindən 2603 nəzarətçi müəllim nəzarət edəcək. Abituriyentlərin ümumi sayı 33139 nəfərdir, onların 28055 nəfəri I qrup, 5084 nəfəri IV qrup üzrə imtahan verir. 137 gənc xarici dövlətlərin vətəndaşlarıdır. Ən böyük abituriyent 1962-ci il, ən kiçik isə 2003-cü il təvəllüdlüdür.

Xatırladaq ki, ilk qəbul imtahanı mayın 13-də keçirilib. II və III ixtisas qrupu üzrə imtahanda 35 mindən bir qədər çox gənc iştirak edib. İmtahanın nəticəsinə görə, yeddi abituriyent 700 bal yığaraq, maksimum nəticə göstərib. II qrup üzrə iki istedadlı abituriyent ən yüksək nəticə göstərib. Bu, Sumqayıt təbii elmlər təmayüllü gimnaziyasının məzunu Cahan Həşimzadə və Xaçmaz şəhərinin 8 saylı orta məktəbinin məzunu Jalə Rəcəbovadır.

III ixtisas qrupu üzrə beş nəfər 700 bal yığıb. Onlar Bakı şəhər Texniki-Humanitar Liseyinin məzunu Zeynəb Quluzadə, Bakı şəhəri 45 saylı orta məktəbin məzunu Elvin Kərimli, paytaxtın 89 saylı orta məktəbinin məzunu Şahxanım Həsənova və "Dəyanət Vəqfi" Türk Liseyinin məzunu Xəyyam Sultanlıdır.

İmtahanların yaz sessiyasının iştirakçılarının ümumi sayı 69 min nəfərdən bir qədər artıq olub.

DİM-in məlumatına görə, bu il Azərbaycanın 46 ali məktəbində plan üzrə 45159 yer (ötən illə müqayisədə 5,3% artım) ayrılıb, onların cəmi 2494-ü və ya 6%-dən bir qədər çoxu dövlət sifarişi üzrə yerlərin payına düşür. Bütün digər yerlər ödənişlidir. Bir çox ekspertlər bu tarazsızlığı ödənişli yerlərə tələbə qəbulunun üst həddinin ləğvi ilə izah edirlər. Ali məktəblər auditoriya və müəllim sayını nəzərə almaqla, istədikləri qədər abituriyent qəbul edə bilərlər.

Bu arada, DİM mayın 17-dən imtahanların ikinci - yay mərhələsinə sənəd qəbulu elan edib. Sənəd qəbulu iyunun 14-nə qədər davam edəcək. I və IV ixtisas qrupu üzrə imtahanlar iyulun 18-də, II və III qrup üzrə iyulun 26-da keçiriləcək. V qrup üzrə imtahan iyulun 10-da keçiriləcək. -0-