Operativ Qərargah özünümüalicənin zərəri, müalicə olunan hərbçilər və karantinin müddəti barədə

Bakı/08.12.20/Turan: Sosial şəbəkələrin istifadəçiləri əsasən  Whatsapp vasitəsilə guya COVİD-19 müalicə etməyə imkan verən yalan tövsiyələr yayırlar. Bu barədə dekabrın 8-də Nazirlər Kabineti yanında Operativ Qərargahın brifinqində Tibbi Ərazi Bölmələrinin İdarəetmə Birliyinin (TƏBİB) nümayəndəsi Yaqut Qarayeva məlumat verib.

Onun sözlərinə görə, vitamin əlavələrini, antikoaqulyantları qəbul etmək olar, ancaq bəzi xəstələr yalnız həkimin tövsiyəsi ilə bunu etməlidirlər. Deksametazon, antibiotiklər və ya virus əleyhinə preparatları özbaşına qəbul etmək olmaz, o qeyd edib. Qarayevanın sözlərinə görə, bu preparatların özbaşına qəbulu ağır nəticələrə gətirib çıxara bilər.

Öz növbəsində, dövlət başçısının köməkçisi Hikmət Hacıyev deyib ki, koronavirusa yoluxanlar çox vaxt rejimi pozurlar, küçəyə çıxırlar. Belə şəxslərin barəsində 266 cinayət işi açılıb və bu cinayət 3 ilədək azadlıqdan məhrumetməni nəzərdə tutur. H. Hacıyev qeyd edib ki, bu gün xəstəxanalarda 900-dən artıq hərbi qulluqçu müalicə olunur və həmçinin onların sağlamlığının qorunması üçün karantin qaydalarına ciddi riayət olunmalıdır.

Dövlət başçısının digər köməkçisi Şahmar Mövsümov bildirib ki, hazırkı məhdudiyyət tədbirləri COVİD-19 peyvəndi yaradılana qədər davam edəcək. Azərbaycan ən təhlükəsiz vaksinləri əldə edəcək.-02D-