Oqtay Gülalıyev Vətənə qayıdır (YENİLƏNİB)

Oqtay Gülalıyev İstanbuldan Türk Hava Yolları təyyarəsi ilə Bakıya gətirilib. O, evədir. Onun gələcək müalicəsi Səhiyyə Nazirliyinin nəzarəti altında həyata keçiriləcəkdir.

*   *   *

2020 Noyabr 08 (Bazar) 21:51:46

Oqtay Gülalıyev Vətənə qayıdır

Bakı/07.11.20/Turan: Türkiyədə Amerika Hospitalında müalicə keçən hüquq müdafiəçisi Oqtay Gülalıyev noyabrın 8-nə keçən gecə Bakıya gətiriləcək.

Hüquq müdafiəçisinin oğlu Təbriz Gülalıyev bildirib ki, ailə Türkiyədə müalicəni davam etdirməkdən imtina edib və bundan sonra müalicəni Vətəndə davam etdirmək üçün müraciət edib.

T. Gülalıyev əlavə edib ki, O. Gülalıyevin müalicəsi evdə davam etdiriləcək.

“Onun səhhətində çox dəyişiklik yoxdur. Gözlərini açır, bəzən əllərini və ayaqlarını hərəkət etdirir. Reqressiya yoxdur. Ümid edirik ki, vətənə qayıtmağımız istənilən halda atamız üçün uğurlu olacaq”, - T. Gülalıyev deyib.

Xatırladaq ki, 29 oktyabr 2019-cu ildə baş vermiş yol-nəqliyyat hadisəsi nəticəsində O.Gülalıyev kəllə- beyin travması alıb və bir neçə saatdan sonra komaya düşüb. Əməliyyat yalnız növbəti gün həyata keçirilib və mütəxəssislərin rəyinə görə,  bu müddətdə beyinə qan sızması artıb.

Sonradan birinci vitse-prezident Mehriban Əliyevanın göstərişi ilə Heydər Əliyev Fondu onun Türkiyədə müalicəsinə köməklik edib və orada ona daha bir neçə əməliyyat edilib. Fəalın sağlamlığının müsbət dinamikasına baxmayaraq, hələ də huşu özünə gəlməyib.

İş üzrə təqsirləndirilən şəxs qismində taksi sürücüsü Kənan Abdullayev cəlb edilib. İlkin olaraq ona Azərbaycan CM-in 263.1-ci maddəsi (yol hərəkəti qaydalarının pozulması, ehtiyatsızlıq səbəbindən zərərçəkmiş şəxsin sağlamlığına zərər vurulmasına səbəb olduqda) üzrə ittiham irəli sürülüb, lakin indi onu 263.1-1-ci maddə ilə ittiham edirlər. Bu, zərərçəkmiş şəxsin sağlamlığına ağır zərər vurulmasını nəzərdə tutur. Birinci maddə üzrə maksimum cəza iki ilədək, ikinci maddə üzrə üç ilədək azadlıqdan məhrumetmə nəzərdə tutulur.—0-