Penitensiar Xidmət Taleh Bağırzadəyə təzyiq göstərilməsini inkar edir

Bakı/15.02.19/Turan: Penitensiar Xidmət Qobustan həbsxanasında din xadimi Taleh Bağırzadəyə işgəncələr verilməsi və onun aclıq etməsi barədə məlumatları bir daha təkzib edib.

Məlumatda deyilir ki, T.Bağırzadənin həyat yoldaşı Leyla İsmayılzadə bəzi KİV-ə bildirib ki, onun ərinə təzyiq göstərilir, vəkilləri ilə görüş verilmir, telefon danışıqlarından məhrum edilir. Bu səbəbdən uzun müddətdir ki, aclıq edir.

Penitensiar Xidmət bildirib ki, fevralın 12-də həbsxananın rəisi Aftandil Ağayev T.Bağırzadənin atasını və həyat yoldaşını qəbul edib.

"Görüş zamanı onlarla izahedici söhbətlər aparılıb, narahatlığa heç bir əsasın olmadığı diqqətə çatdırılıb və qeyd olunub ki, Talehə qarşı heç bir hüquqazidd hərəkətlərə yol verilməyib, vəkili və qohumları ilə görüşə, habelə telefon danışıqlarına lazımi şərait yaradılıb", - məlumatda qeyd olunub.

Penitensiar Xidmət bildirib ki, T.Bağırzadə özü vəkillə görüşdən və telefon danışıqlarından imtina edib.

"Qohumlarının narahatlığını anlayaraq həbsxana rəisi Taleh Bağırzadəyə xidməti otağında onlar ilə görüşməsi üçün şərait yaradıb. Lakin məhbus otağa girərkən qohumlarının çıxmasını tələb edib. Rəis narazılığının səbəbini soruşduqda "mən gündəmdə qalmaq istəyirəm, bu, mənim şansımdır" deyib.

Xatırladaq ki, ötən gün T.Bağırzadənin həyat yoldaşı Turan agentliyinə bildirmişdi ki, T.Bağırzadə ona təzyiqlərin davam etdiyini, telefon danışıqlarına imkan verilmədiyini və aclığı davam etdirdiyini söyləyib.

L.İsmayılzadə ərinin zəif, arıqlamış, yorğun vəziyyəədə olduğunu deyib.

Qeyd edək ki, müstəqil hüquq-müdafiə qurumları Azərbaycan həbsxanalarında monitorinq aparmaq imkanlarından məhrumdur. -03B06-