Polad Aslanov aclığı dayandırıb

Bakı/12.08.20/Turan: Xeberman.com saytının rəhbəri Polad Aslanov aclığın 6-cı günündə  aksiyanı dayandırıb. Bu barədə onun xanımı Gülmirə Aslanova məlumat verib. O bu gün həyat yoldaşı ilə telefonla danışıb. Onun sözlərinə görə, P. Aslanov həkimlərin nəzarəti altındadır.

“Polad hüquq müdafiəçilərinə, müstəqil mediaya, dostlarına, onu dəstəkləyənlərə təşəkkür edib və onlara öz salamlarını çatdırıb”, - G. Aslanova bildirib.

“Ailəmin və hüquq müdafiəçilərinin narahatlığını nəzərə alaraq, aclığı dayandırdım, lakin mənim tələblərim qüvvədə qalır”, - G.Aslanova həyat yoldaşının sözlərindən sitat gətirib.

O qeyd edib ki, avqustun 7-də P.Aslanovu DTX istintaq təcridxanasından  Penitensiar Xidmətin 1 saylı Bakı İstintaq Təcridxanasına köçürüblər və hazırda saxlanma şəraitindən və onunla rəftardan şikayəti yoxdur.

* Polad Aslanov 2019-cu il iyunun 12-də saxlanılıb və CM-in 274-cü maddəsi (dövlətə xəyanət) ilə 4 ay müddətinə həbs edilib. İstintaqı Dövlət Təhlükəsizliyi Xidməti aparır. Oktyabrın 5-də həbs müddəti daha 4 ay uzadılıb.O, İranın xüsusi xidmət orqanları ilə əməkdaşlıq üçün digər jurnalistləri cəlb etməkdə ittiham olunur.

Avqustun 5-də məhkəmə prosesində P.Aslanov istintaqın obyektiv aparılması tələbilə aclıq elan edib.-06B-