Polad Aslanov effektiv tibbi yardım göstərilməməsindən şikayət edir

Bakı/14.03.22/Turan: Həbs cəzası çəkən jurnalist Polad Aslanov ona effektiv tibbi yardım göstərilməməsindən şikayət edib. Bu barədə onun həyat yoldaşı Gülmira Aslanova bildirib.

Onun sözlərinə görə, jurnalistin ötən ay ədalətsiz məhkəmə hökmünə və kassasiya şikayətinə baxılmasının yubadılmasına etiraz əlaməti olaraq uzunmüddətli aclıq aksiyası keçirməsi nəticəsində onun sağlamlığında ciddi nəticələr yaranıb.

Aclıqdan sonra onun üzündə, əllərində, ayaqlarında ödəm, qarın boşluğunda və ayaqlarında ciddi ağrılar yaranıb.

"Polad və mən dəfələrlə onun tibbi müayinədən keçirilməsi üçün müraciət etmişik. Amma 1 saylı cəzaçəkmə müəssisəsində onu müayinə, müalicə etmirlər, yalnız gündə bir dəfə vitamin B kompleksi vururlar. Tibb məntəqəsinin həkimi ona bildirib ki, onlarda rentgen aparatı yoxdur və müayinə üçün o, Penitensiar Xidmətin Müalicə Müəssisəsinə aparılmalıdır", deyə G.Aslanova öz facebook səhifəsində yazıb.

O, Aslanovun hərtərəfli müayinə edilməsi və effektiv müalicə təyin edilməsi üçün Ombudsman Aparatına və Beynəlxalq Qırmızı Xaç Komitəsinin Bakı nümayəndəliyinə müraciət edib.

Penitensiar Xidmətdən şərh almaq mümkün olmayıb.

Xeberman.com saytının təsisçisi və rəhbəri Polad Aslanov 2019-cu ilin iyununda dövlətə xəyanət ittihamı ilə həbs edilib və 16 il azadlıqdan məhrumetmə cəzasına məhkum edilib. Hüquq müdafiəçiləri onu siyasi məhbus kimi tanıyıblar. Fevralın 24-də Ali Məhkəmə onu 10 il müddətinə azadlıqdan məhrum edib. -06В-