Polad Aslanovun işi üzrə məhkəmə istintaqı başa çatıb

Bakı/09.10.20/Turan: Bakı Ağır Cinayətlər Məhkəməsində Polad Aslanovun işi üzrə məhkəmə istintaqı başa çatıb. Bu barədə onun həyat yoldaşı Gülmirə Aslanova məlumat verib.

Onun sözlərinə görə, oktyabrın 8-də keçirilən iclasa şahidlər - İslam Partiyasının mətbuat xidmətinin keçmiş rəhbəri Akif Heydərli, partiyanın keçmiş üzvü Elçin Manafov və “Müsəlman Birliyi” Hərəkatının həbsdə olan fəalı Abbas Hüseynovun anası Rəhimə Hüseynova gəlməyiblər.

Hakim bildirib ki, onlar prosesdə iştirakın mümkünsüzlüyü barədə teleqramlar göndəriblər. Ancaq teleqramlar müdafiə tərəfinə təqdim edilməyib.

G.Aslanovanın sözlərinə görə, həmin şəxslər İrana səfər zamanı həyat yoldaşı ilə eyni nümayəndə heyətində olublar və ibtidai istintaqda ona qarşı yalan ifadə veriblər.

Digər iki şahid – Ramiz Həsənov və Rauf Qurbanlı da məhkəməyə gəlməyiblər.

“Rauf Qurbanlı bizim qonşudur. Hər gün onu görürük, amma nədənsə məhkəməyə gəlmir. Onlar istintaqa ifadə veriblər, lakin məhkəməyə gəlmirlər ki, Poladın və vəkilin suallarına cavab versinlər, - G. Aslanova qeyd edib.

Vəkil Elçin Sadıqov onların məhkəməyə məcburi gətirilməsi  barədə vəsatət qaldırıb. Lakin hakim məhkəmə istintaqının başa çatdığını elan edib.

Növbəti iclas 16 oktyabrı saat 16:00-a təyin edilib, iclasda prokurorun çıxışı gözlənilir və hökm elan oluna bilər.

G.Aslanova qeyd edib kiki, 22 şahiddən yalnız 17 nəfəri məhkəmə dinləyib və onların əksəriyyəti ilkin istintaqda ifadələrinin təhrif olunduğunu bildiriblər.

G.Aslanova bildirib ki, oktyabrın 1-də həyat yoldaşı vəkili Elçin Sadıqovun fərdi vəkillik fəaliyyəti hüququndan məhrum edilməsinə görə aclıq aksiyası elan edib.

“Bundan sonra Polad təzyiqlərə məruz qalıb: onu saçını kəsiblər, qandalları taxaraq ağır cinayətdə təqsirləndirilən 4 nəfərlə birlikdə karserə salınıb. Onlar Poladdan aclıq aksiyasına son qoymasını tələb ediblər, çünki onun üzündən karserə düşdüklərini deyib. Karserdə 4 gün qaldıqdan sonra Poladın temperaturu yüksəlbi, lakin ona heç bir tibbi yardım göstərilməyib. Ancaq Polad ruh yüksəkliyini saxlayır. O, bütün çətinliklərə dözməyə hazır olduğunu bildirib, ordumuza Qarabağda uğurlar arzulayıb”, - G. Aslanova qeyd edib.

* Polad Aslanov 12 iyun 2019-cu ildə saxlanılıb  və Cinayət Məcəlləsinin 274-cü  maddəsi (vətənə xəyanət)  ilə ittiham olunaraq 4 ay həbs edilib. İstintaqı Dövlət Təhlükəsizlik Xidməti aparır. Oktyabrın 5-də həbs müddəti daha 4 ay uzadılıb. O, İranın xüsusi xidmət orqanları ilə əməkdaşlıq üçün digər jurnalistləri cəlb etməkdə ittiham olunur. “Siyasi Məhbusların Azadlığı Uğrunda” İttifaq Polad Aslanovu siyasi məhbus kimi tanıyıb. 06-