Press Klub KİV-in inkişafı üzrə “Yol xəritəsi”ni hazırlayır

Bakı/08.01.20/Turan: Yanvarın 7-də ekspertlərin və bir sıra media strukturlarının rəhbərlərinin iştirakı ilə Bakı Press Klubunun İdarə Heyətinin ilk iclası keçirilib.

Press Klubun mətbuat xidmətindən verilən məlumata görə, Zeynal Məmmədli, Qulu Məhərrəmli, Mehman Əliyev, Aynur Kərimova, Elçin Şıxlı, Arif Əliyev cari problemləri və gələcək strategiyaları müzakirə ediblər.

Əsasən  jurnalist tədbirlərinin keçirilməsi üçün yer ayrılması və bununla bağlı maliyyə məsələlərinin həlli müzakirə olunub.

Həmçinin bu ilin fevralından İnternet kanalın yayımını təmin etmək üçün tədbirlər planı təsdiq edilib.

Press Klubun mühüm fəaliyyət istiqamətlərindən biri xaricdəki jurnalistlər və xarici media qurumları ilə əməkdaşlıqdır.

İdarə Heyəti Press Klubun Rusiya Bürosunun fəaliyyətinin genişləndirilməsinin, həmçinin  digər regionlarda da oxşar qurumların yaradılmasının vacibliyini qeyd edib.

Azərbaycan jurnalistikasının hazırkı vəziyyəti ayrıca müzakirə edilib. Yerli medianın dirçəlişinə və inkişafına yönəldilmiş “Yol xəritəsi”nin strateji sənəd layihəsinin hazırlanması barədə qərar qəbul edilib.

* Press Klub 1998-ci ildə bir neçə KİV tərəfindən təsis edilib. Ancaq bir neçə il sonra maliyyə problemləri səbəbindən fəaliyyətini dayandırmalı olub.

2019-cu ilin sonunda üç əvvəlki təsisçi – “Yeni Nəsil” Jurnalistlər Birliyi, “Zerkalo” qəzeti və Turan agentliyi Press Klubun fəaliyyətini bərpa etmək qərarına gəliblər.-02D-