�Qarabağ� hakimin obyektiv olmadığına görə protest verməyəcək

Bakı/23.11.17/Turan: "Qarabağ" klubu "Çelsi" ilə dünənki matç zamanı portuqaliyalı hakim Manuel De Souzanın qərarı ilə bağlı UEFA-ya protest verməyəcək. Bu barədə klubun məşqçisi Qurban Qurbanov matçdan sonra mətbuat konfransında bildirib.

"Hakimin qərarı ilə bağlı narazılıq var, ancaq nəyisə dəyişmək olmayacaq. Penaltinin təyin edilməsinə gəlincə, bir şey deyə bilmərəm. Ancaq oyundan kənarlaşdırma lazımsız idi, çünki 11 metrlik verildi", - Q.Qurbanov bildirib.

Xatırladaq ki, matçın 18-ci dəqiqəsində hakim "Qarabağ"ın qapısına penalti təyin edib və eyni zamanda ikiqat cəza prinspi tətbiq edərək komandanın kapitanı Rəşad Sadıqovu meydandan uzaqlaşdırıb.

Qeyd edək ki, hakimlərin çoxu əgər pozuntu zədə təhlükəsi yaratmırsa bu praktikadan imtina edirlər.

İkinci taymda portuqaliyalı hakim "Qarabağ"ın qapısına daha bir penalti təyin edib, ancaq bu, mübahisəli olub.

FİFA-nın keçmiş hakimi Tahir Süleymanov hakimin hərəkətini Turan-a şərh edərkən deyib ki, oyun qaydalarında çoxlu boşluqlar var.

"FİFA və UEFA hakimlərə matçları oyunların ruhuna uyğun idarə etməyi və şablonlardan çəkinməyi tövsiyə edir. Rəşad Sadıqovun oyundan kənarlaşdırılması epizodunda hakim qərarı şablon əsasında qəbul etdi, oyunun ruhuna uyğun davranmadı", - T.Süleymanov vurğulayıb.

"Qarabağ"ın qapısına ikinci penaltinin təyin edilməsinə gəlincə, ekspert qeyd edib ki, hakimin qərarı onun Çempionlar Liqasının səviyyəsinə uyğun olmadığını göstərdi.

"Hər oyunda onlarla belə hal baş verir. Hakim öz səriştəsiz hərəkətilə oyunu artıq 20-ci dəqiqədə başa çatdırdı", - o hesab edir.

"Qarabağ"ın protest vermək istəməməsinə toxunan T.Süleymanov hesab edir ki, istənilən halda UEFA qərar qəbul edəcək. "Ola bilməz ki, UEFA-nın bu sahəyə cavabdeh olan funksionerləri portuqaliyalı hakimin hərəkətindən razı qalsınlar", - T.Süleymanov vurğulayıb.-71D-