“Qarabağ nümayişi” işi üzrə birinci qrupun məhkəməsi başlayıb

Bakı/04.03.21/Turan:  Martın 4-də Səbayel Rayon Məhkəməsində ötən il iyulun 14-15-də Bakıda orduya dəstək aksiyası ilə əlaqədar məsuliyyətə cəlb edilmiş 12 nəfərdən ibarət qrupa qarşı işə baxılmasına başlanılıb.

Bakı Apellyasiya Məhkəməsinin binasında Ağamalı Qafarovun sədrliyilə keçirilən məhkəmə qarşısına çıxanların arasında Xalq Cəbhəsi Partiyası Rəyasət Heyətinin dörd üzvü -Bəxtiyar İmanov, Ayaz Məhərrəmov, Fuad Qəhrəmanlı və Məmməd İbrahim var.

İttiham aktı elan olunduqdan sonra Məmməd İbrahim və Ayaz Məhərrəmov daxil olmaqla, 8 müttəhimin ifadələri dinlənilib. Hər ikisi ittihamları rədd edərək onları siyasi motivli adlandırıblar. Onlar qeyd ediblər ki, ümumiyyətlə, aksiyada iştirak etməyiblər.

Digər müttəhimlər günahlarını ya etiraf etməyiblər, ya da ittihamla qismən razılaşıblar.

Növbəti iclas 10 mart saat 10:30-a təyin edilib.

Bu iş üzrə 37 nəfər, o cümlədən Xalq Cəbhəsi Partiyasının 16 fəalı, 2 Müsəlman Birliyi Hərəkatının 2 üzvü və Demokratiya və Rifah Hərəkatının 1 üzvü təqsirləndirilən şəxs qismində keçir.

İş üzrə keçənlərin sayı çox olduğundan müttəhimlər 12 nəfərlik üç qrupa bölünüblər.

Müttəhimlərin hamısına CM-in 127 (qəsdən yüngül bədən xəsarəti törətmək), 186 (başqasının əmlakının ziyan vurulması və ya məhv edilməsi), 233 (ictimai asayişin pozulması) və 315-ci (polis əməkdaşına qarşı qüc tətbiq edilməsi) maddələri ilə ittiham irəli sürülüb. Onları 7 ilədək azadlıqdan məhrum olunma təhlükəsi gözləyir.

*14-15 iyul 2020-ci il aksiyası kortəbii olub, aksiyada on minlərlə adam iştirak edib. Onlar bütün gecə Bakı küçələrində yürüş ediblər, hakimiyyətdən Qarabağda müharibəyə başlamağı tələb ediblər. Buna iyulun 12-də Tovuzda ermənilərin hücumu və bir neçə azərbaycanlı hərbçinin öldürülməsi səbəb olub.

Bir qrup aksiya iştirakçısı parlamentin binasına daxil olub, bundan sonra saxlanmalar başlayıb. Bununla yanaşı, rəsmi təbliğat AXCP-ni vəziyyətdən siyasi məqsədlər üçün istifadə etməkdə ittiham edib.

2020-ci ilin noyabrında İkinci Qarabağ Müharibəsi başa çatdıqdan sonra həbs edilmiş şəxslərin barəsində həbs qətimkan tədbiri dəyişdirilib və onlar həbsdən azad ediliblər –03B06-